الەمنىڭ ەڭ ىقپالدى 100 ادامى بەلگىلى بولدى
ايتا كەتەرلىگى، بۇل سىيلىق يەگەرلەرى حالىقتىڭ داۋىس بەرۋى ناتيجەسىندە ىرىكتەلەدى. مۇنان بولەك، بەيسەنبى كۇنى «Time» جۋرنالى الەمدەگى ەڭ بەدەلدى 100 ادامنىڭ ءتىزىمىن جاريا ەتكەن بولاتىن.
«MTV Movie Awards» سىيلىعى تابىستالدى
اعىمداعى جىلى ەڭ ۇزدىك فيلم مارتەبەسى «جۇلدىزدار كىنالى» مەلودراماسىنا بەرىلدى. شەيلين ۆۋدلي ۇزدىك اكتريسا اتانسا، بۇل اتالىمدا ەرلەر اراسىندا «مەرگەن» اتتى اسكەري درامادا باستى رولدە ويناعان برەدلي كۋپەرگە تەڭ كەلەر ەشكىم بولمادى.
جەكسەنبى كۇنى كەشكىسىن گولليۆۋدتىڭ Nokia Theatre كينوتەاترىندا 24- «MTV Movie Awards 2015» كينو سىيلىعىن تابىستاۋ سالتاناتتى شاراسى ءوتتى. شاراعا قازىرگى زامانعى ەڭ ۇزدىك ءارى تانىمال سكارلەتت يوحانسسون، دجەنيفەر لوپەس، مارك رۋففالو، كارا دەلۆين سىندى كوپتەگەن كينو جۇلدىزدارى قاتىستى.
بۇل سىيلىقتىڭ تۇبەگەيلى ەرەكشەلىگى جەڭىمپازدى ىرىكتەۋ جۇيەسىندە دەسەك تە بولادى. «وسكار» سىيلىعىمەن سالىستىرعاندا ۇمىتكەرلەردىڭ تاعدىرىن كينواكادەميا تورەشىلەرىنىڭ مۇشەلەرى ەمەس، MTV- ءدىڭ رەسمي سايتىنداعى داۋىس بەرۋگە قاتىسقان كورەرمەندەر شەشەدى.
كەشتى امەريكاندىق سەناريشى، پروديۋسەر ءارى اكتريسا ەمي شۋمەر جۇرگىزدى. ادەتتەگىدەي جەڭىمپازدار پوپ-كورن سالىنعان شەلەك تۇرىندەگى مۇسىنشەلەرگە يە بولدى. «جىل فيلمى» اتتى مارتەبەلى اتالىم بويىنشا باستى سىيلىق وسى جولى «جۇلدىزدار كىنالى» اتتى جاستار دراماسىنا بەرىلدى. جازىلماس دەرتكە دۋشار بولعان ەكى جاستىڭ قارىم-قاتىناسى جايىندا سىر شەرتەتىن بۇل تۋىندىنى رەجيسسەر دجوش بۋن تۇسىرگەن. فيلم وزەگىنە 2012-جىلى جارىق كورگەن امەريكاندىق قالامگەر دجون گريننىڭ فيلممەن اتتاس رومانى تۇرتكى بولعان.
ءدال وسى فيلمدە باس رولدە ويناعان شەيلين ۆۋدلي «ۇزدىك ايەل ءرولى» اتالىمىنداعى سىيلىققا يە بولدى. سونىمەن قاتار MTV- ءنىڭ سۇيىكتى اكتريساسىنا اينالعان ول اتالعان فيلمدە ەنسەل ەلگورتپەن جاقسى سۇيىسكەنى ءۇشىن پوپ-كورن سالىنعان شەلەككە جانە «MTV Trailblazer Award»- تىڭ ەرەكشە سىيلىعىنا يە بولدى.
رەجيسسەر كلينت يستۆۋدتىڭ «مەرگەن» تۋىندىسىندا باستى ءرولدى سومداعان برەدلي كۋپەر ۇزدىك اكتەر اتاندى. فيلم لاڭكەستەردىڭ جانالعىشىنا اينالعان ا ق ش ارمياسىنىڭ مەرگەنى كريس كايلدىڭ درامالىق ومىرىنەن سىر شەرتەدى.
«ورمانعا بويلاي ەنگەندە» ميۋزيكلىندە جالماۋىزدىڭ ءرولىن ويناعان مەريل ستريپكە «ۇزدىك مىستان» سىيلىعى تابىستالدى. ال «ماچو مەن بوتان - 2» تۋىندىسىنا تۇسكەن چەننينگ تاتۋم «ۇزدىك كومەديالىق ءرول» سىيلىعىن الدى.
«قاتتى قورقىتۋ» ستيلىندەگى ۇزدىك ءرولى ءۇشىن سىيلىعى «تابىنۋشى» اتتى ەروتيكالىق تريللەردە ءمۇعالىمنىڭ ءرولىن سومداعان دجەننيفەر لوپەسكە بۇيىردى.
«كورشىلەر. سوعىس سوقپاعىندا» فيلمى «ۇزدىك دۋەت» (زاك ەفرون مەن دەيۆ فرانكو)، «ۇزدىك WTF- ءساتى» (سەت روگەن مەن روۋز بيرن) جانە «مايكاسىز ۇزدىك شىعۋ» (زاك ەفرون) ساناتتارىندا 3 سىيلىققا يە بولدى.
«Time» جۋرنالىنىڭ نۇسقاسى بويىنشا ەڭ ىقپالدى ادامداردىڭ توپ-100
بەيسەنبى كۇنى امەريكاندىق «Time» جۋرنالىنىڭ رەداكتسياسى عالامشاردىڭ ەڭ ىقپالدى ءجۇز ادامىنىڭ رەيتينگىن تۇزگەن بولاتىن. اتالعان تىزىمگە ادەتتە كورنەكتى ساياساتكەرلەر مەن مەملەكەت قايراتكەرلەرى، سپورتشىلار مەن ونەر ادامدارى كىرەدى. بۇل ءتىزىم سوڭعى 16 جىل بويى جاسالىپ كەلە جاتىر. ول «الپاۋىتتار»، «كوشباسشىلار»، «پيونەرلەر»، «ارتىستەر» جانە «يكونا» اتتى 5 ساناتتان تۇرادى ءارى ولاردىڭ ءارقايسىسىنا 20 ادامنان كىرەدى. ىرىكتەۋ باسىلىمنىڭ سايتىندا داۋىس بەرۋ ارقىلى جۇرگىزىلگەنىمەن سوڭعى شەشىمدى باسىم رەداكسياسى جاسايدى.
ساۋالناما ناتيجەسىنە وراي باسىلىم قىزمەتكەرلەرى 5 ءنومىر دايىندادى. جۋرنالدىڭ سىرتقى مۇقاباسىنا كانە ۋەست («الىپتار»)، جۋرناليست حورحە راموس («كوشباسشىلار»)، بالەرينا ميستي كوپلەند («پيونەرلەر»)، برەدلي كۋپەر («ارتىستەر») جانە سۋديا رۋت بەيدەر گينزبۋرگتىڭ («يكونا») سۋرەتى باسىلدى.
11- ساۋىردە اياقتالعان جۋرنال وقىرماندارىنىڭ داۋىس بەرۋى ناتيجەسىندە عالامشاردىڭ ەڭ ىقپالدى باستاپقى ون ادامنىڭ تىزىمىنە رەسەي پرەزيدەنتى ۆلاديمير پۋتين، رەپ-ءانشىسى لي چە رين، لەدي گاگا، رياننا، تەيلور سۆيفت، ەمما ۋوتسون، دالاي-لاما، پاكىستاندىق قۇقىق قورعاۋشى مالالا يۋسۋفزاي، بەيونسە جانە ريم پاپاسى فرانتسيسك كىردى.
اعىمداعى جىلى عالامشاردىڭ ىقپالدى ادامدارىنىڭ جۇزدىگىنە 40 ايەل كىرىپ وتىر. ولاردىڭ ىشىندە بارشا الەمدەگى ايەلدەردىڭ ءبىلىم الۋعا قولجەتىمدىلىگىن جاقتاپ جۇرگەن پاكىستاندىق قۇقىق قورعاۋشى 17 جاستاعى مالالا يۋسۋفزاي بار. ول بۇل تىزىمدەگى ەڭ جاس ىقپالدى ادام بولىپ تۇر. «Time» جۋرنالىنىڭ توپ-100 دىگىنىڭ لاۋرەاتى اتانعان ەڭ قارت ادام 88 جاستاعى تۋنيس پرەزيدەنتى - بەدجي سايد ەسسەبسي.
امەريكاندىق جۋرنال الەمنىڭ ەڭ ىقپالدى 100 ادامىنىڭ ءتىزىمىن العاش رەت 1999-جىلى جاريا ەتكەن بولاتىن. ول كەزدە بۇل ءتىزىلىم 20 عاسىردىڭ ەڭ ىقپالدى ادامدارىنا ارنالعان ەدى. سول ۋاقىتتا بەرى باسىلىم جىل سايىن بۇل ءتىزىمدى ءتۇزىپ، جاريا ەتىپ كەلەدى.
اۆتور: مارلان جيەمباي
