وسكەمەندەگى كونسەرۆى زاۋىتى 100 پايىز قازاقستاندىق ۇلەسكە كوشتى

استانا. قازاقپارات - كاسىپورىن بۇگىندە قالبىردا بۇقتىرىلعان ەتتىڭ 30 ءتۇرىن شىعارادى. «وسكەمەندە وندىرىلگەن» دەگەن تاۋارلىق بەلگىسى بار ونىمدەر بۇگىندە ىشكى نارىقتى تولىق قامتۋمەن قاتار ت م د ەلدەرىنە دە ەكسپورتتالىپ جاتىر.

شىعىس قازاقستاندا ازىرگە ءىرى كولەمدە مالدىڭ ەتىن وڭدەيتىن زاۋىت جوق. سوندىقتان وبلىستاعى الىس- جاقىن شارۋا قوجالىقتارى مەن مال يەلەرى وسكەمەن كونسەرۆى كومبيناتىنا سويىپ نەمەسە تىرىدەي تاپسىرادى. اقشانى دا قولما- قول الادى.

بۇل، اسىرەسە، الىس اۋدانداعى تۇرعىندار ءۇشىن ءتيىمدى.

قۇمار مولدانبايەۆ، زايسان اۋداندىق ۆەتەريناريا ينسپەكتسياسى باسشىسىنىڭ ورىنباسارى:

- ءبىزدىڭ اۋدان -  وبلىس ورتالىعىنان ەڭ قاشىق اۋدان. بىزدە وزىمىزدە جەكە ەت كومبيناتى بولماعاندىقتان، وسى ەت كومبيناتىمەن مەموراندۋمعا وتىردىق. 500 شاقىرىم جەردەن اكەلەمىز. بار شارۋا ۋاقىتىندا ىستەلىپ وتىر.

تىرىدەي قابىلدانعان مالدى كومبيناتتىڭ قاساپشىلارى وزدەرى سويادى. ۇساقتالىپ تۋرالعان ەت، بىرنەشە تۇرگە بولىنەدى. بۇل جۇمىستاردىڭ كوبى قولمەن اتقارىلادى. زاۋىت 100 پايىز وتاندىق ونىمگە قۇرىلعان. بۇقتىرىلعان ەتكە قاجەت قالبىرلاردى دا وزدەرى جاسايدى. جۇقا قاڭىلتىردى قاراعاندىدان الادى.

كومبينات تاۋلىگىنە 60 توننا ەت قابىلداۋعا قاۋقارلى. ال قالبىرلانعان ەتتىڭ 30 تۇرىنەن 1 ايدا 300 دەن 500 مىڭ داناعا دەيىن شىعارادى. كاسىپورىندا بۇگىندە 150 ادام ەڭبەك ەتەدى.

ءاليا كوشەربايەۆا، ەت قالبىرلاۋشى:

- ءونىمنىڭ ءتۇر- ءتۇرىن شىعارامىز. بالىقتان تومات قوسىلعان مايشاباق شىعارامىز. مايمەن پاشتەتتەر بار. ەتتەن، باۋىردان جاسالعان. وسى اتالعان ونىمدەردىڭ ءبارىن ءوز وتباسىممەن پايدالانامىن. ويتكەنى بۇل قاۋىپسىز. ءوزىمىز شىعارعاننان كەيىن بىلەمىز قالاي جاسالعانىن. قالبىردا بۇقتىرىلعان ەت ەلىمىزدىڭ بارلىق وڭىرىندە ساۋدالانسا، اسكەري بولىمدەر مەن ءتۇرلى مەكەمەلەرگە تاپسىرىس بويىنشا جىبەرىلەدى. سوعان سايكەس مەملەكەتتەن جىل سايىن قارجىلاي كومەك الىپ وتىر.

حاميت نوعايبايەۆ، «ۇلان» ەت- كونسەرۆى زاۋىتىنىڭ ديرەكتورى:

- ءبىزدىڭ كاسىپورىن مەملەكەتتىڭ كومەگىنىڭ ارقاسىندا جۇمىس ىستەپ تۇر. بۇعان دەيىن 150 ميلليون تەڭگە نەسيە الدىق. سوعان سايكەس مەملەكەت سۋبسيديا تولەپ وتىر. ناتيجەسىندە 100 پايىز قازاقستاندىق ۇلەس بويىنشا جۇمىس ىستەپ وتىرمىز.

ىشكى نارىقتى وڭدەلگەن ەتپەن قامتىپ، سىرتقا ەكسپورتتاۋ ءۇشىن سەمەي مەن اياگوزدە 2 كومبينات سالىنباق. سول كەزدە يمپورتقا تاۋەلدىلىك ءبىرشاما ازايماق.

دۇيسەمباي سەليحانوۆ، وبلىستىق اۋىل شارۋاشىلىعى باسقارماسىنىڭ باسشىسى:

- وسى 2 ەت كومبيناتى ىسكە كىرىسسە، بارلىق ەتتى وڭدەيمىز دەپ ايتا المايمىن. ءبىراق ءبىرتالاي جاعدايمىز جاقساراتىن بولادى. بۇل ەت كومبيناتتارىن 2016 -جىلى ىسكە قوسامىز دەپ ويلاپ وتىرمىز.

قازىر وبلىستا ءىرىلى- ۇساقتى 17 مىڭعا جۋىق شارۋاشىلىق بار. ال وڭىردە 40 شارۋاشىلىق تەك ەت باعىتىنداعى اسىلتۇقىمدى مال وسىرەدى. سوندىقتان ولار دا وبلىستا ەت كومبيناتىنىڭ دا تەزىرەك سالىنۋىنان ءۇمىتتى.

www.24.kz