قىتايدا 100 دەن اسا ۆەتنامدىق ايەلدەر ءىز-ءتۇسسىز جوعالدى
وسى وقىس وقيعاعا بايلانىستى قىتاي بيلىگى ىزدەستىرۋ، تەكسەرۋ امالدارىن باستادى. ۇستىمىزدەگى جىلدىڭ قاراشا ايىنىڭ سوڭىندا جوعالعان ايەلدەردىڭ ءبارى حاندان قالاسىنىڭ ماڭىندا ورنالاسقان اۋىلدىق ەلدى-مەكەندە تۇراتىن ەر ادامداردىڭ قالىڭدىقتارى بولىپ شىقتى. دەموگرافيالىق احۋالدى رەتتەۋ ماقساتىندا تالاي جىلدان بەرى جۇزەگە اسىرىلىپ كەلە جاتقان بۇل ەلدەگى «ءبىر بالا» ساياساتىنىڭ ءارى شىعىس مەنتاليتەنىندە ۇل بالاعا ارتىقشىلىق بەرىلەتىنىنە بايلانىستى، ياعني، گەندەرلىك ديسبالانستىڭ سالدارىنان قىتايدا تۇرمىسى تومەن بويداقتار قالىڭدىقتى سىرتتان، دالىرەگى، وڭتۇستىك ازيا ەلدەرىنەن ىزدەۋگە ءماجبۇر.
ناقتىراق ايتقاندا، بويداقتار تانىسۋ قىزمەتىنە جۇگىنىپ، ۆەتنام، بيرما جانە كامبودجا سەكىلدى ەلدەردەن قالىڭدىق ىزدەيدى. China Daily گازەتىنىڭ تاراتقان حابارىنا قاراعاندا، بويداقتارعا قالىڭدىق تاۋىپ بەرگەن جەڭگەتاي دا ءىز-ءتۇسسىز جوعالعان.
اتالمىش باسىلىمنىڭ دەرەگىنە سەنسەك، قالىڭدىقتاردىڭ جوعالۋىنا ۇيىمداسقان قىلمىستىق توپ كىنالى كورىنەدى. سونداي-اق، ءار قالىڭدىق ءۇشىن مىڭداعان يۋان (قالىڭمال) تولەنگەن. ۇشتى-كۇيلى جوعالعان ۆۋ مەيۋ ەسىمدى جەڭگەتاي 20 جىلدان وسى وڭىردە تۇرىپ كەلگەن. ۇستىمىزدەگى جىلدىڭ باس كەزىندە ول ۆەتنامنان قالىڭدىق تاۋىپ بەرەتىنىن ۋادە ەتىپ، ءار كليەنتتەن 115 مىڭ يۋاننان (18600 دوللاردان) العانى دا بەلگىلى بولدى.
islam.kz
