ن. نازاربايەۆ: قازاقستاندا 100 دەن استام فرانسۋز كومپانيالارى جۇمىس جاسايدى

استانا. قازاقپارات -  مەملەكەت باسشىسى نۇرسۇلتان نازاربايەۆتىڭ قازاقستانعا مەملەكەتتىك ساپارمەن كەلگەن فرانسۋز رەسپۋبليكاسىنىڭ پرەزيدەنتى فرانسۋا وللاندپەن كەزدەسۋى بولدى.

اقوردانىڭ باسپا ءسوز قىزمەتىنىڭ حابارلاۋىنشا، كەزدەسۋ بارىسىندا قازاق- فرانسۋز ستراتەگيالىق سەرىكتەستىگىنىڭ نەگىزگى باعىتتارى تالقىلانىپ، ساۋدا- ەكونوميكالىق، ينۆەستيتسيالىق، عارىش، مۇناي- گاز جانە تەمىرجول ماشينالارىن جاساۋ سالالارىنداعى ىنتىماقتاستىق ماسەلەلەرى قارالدى.

مەملەكەت باسشىلارى سونداي- اق حالىقارالىق جانە وڭىرلىك كۇن تارتىبىندەگى وزەكتى جايتتار تۋرالى دا پىكىر الماستى.

نۇرسۇلتان نازاربايەۆ ەكىجاقتى ىنتىماقتاستىقتىڭ نەگىزىن ەلىمىزدىڭ تاۋەلسىزدىگىن ەۋروپادا العاشقىلاردىڭ ءبىرى بولىپ تانىعان جانە 1993 - جىلى قازاقستانعا كەلگەن فرانسيا پرەزيدەنتى ف. ميتتەران قالاعانىن ايتتى.

- سودان بەرى دامىپ كەلە جاتقان قارىم- قاتىناستارىمىز بۇگىندە ستراتەگيالىق سەرىكتەستىك دەڭگەيىندە. قازاقستاندا 100دەن استام فرانسۋزدىق كومپانيا جۇمىس ىستەيدى، كوپتەگەن بىرلەسكەن كاسىپورىندار بار. قازىر ونداعان بىرلەسكەن جوبالار ىسكە اسىرىلۋدا.  سىزبەن بىرگە ىسكەر توپ وكىلدەرىنىڭ ۇلكەن  ءبىر قاۋىمى كەلگەنىنە قۋانىشتىمىن. ءبىزدىڭ كەزدەسۋىمىز قارىم- قاتىناستارىمىزدى ءارى قاراي ىلگەرىلەتۋگە ىقپال ەتەدى دەپ سەنەمىن، - دەدى مەملەكەت باسشىسى.

ف. وللاند ءوزىنىڭ بۇل ساپارى قازاقستان پرەزيدەنتىنىڭ فرانسياعا 2012 - جىلعى ساپارىندا جاسالعان ۋاعدالاستىقتىڭ ناتيجەسى ەكەنىن اتاپ كورسەتتى.

- ەگەر كەيىنگە ءۇڭىلىپ، قازاقستاننىڭ ف. ميتتەراننىڭ ساپارىنان بەرگى ءجۇرىپ وتكەن جولىنا قارايتىن بولساق، بۇگىندە ول دامىپ، نىعايىپ كەلە جاتقان مۇلدە باسقا ەل. ءبىز رەسەي مەن ەۋروپا ەلدەرىنىڭ اراسىنداعى قارىم- قاتىناستىڭ شيرىعۋى بايقالىپ وتىرعان ۋاقىتتا كەزدەسىپ وتىرمىز. مەن مۇنىڭ ءتۇيىنى شەشىلگەنىن قالايمىن، ال بۇل ورايدا ءسىزدىڭ ەل ايرىقشا ءرول اتقارادى، - دەدى فرانسيا پرەزيدەنتى.