داۋلەت تۇرلىحانوۆ اۋداندىق ءبىلىم بولىمىنە 100 مىڭ ا ق ش دوللارىن سىيعا تارتتى
بۇل تۋرالى اۋداندىق اكىمدىكتىڭ باسپا ءسوز قىزمەتى حابارلادى.
سپورتشىلار قازالىلىق جاس جەتكىنشەكتەرگە وزدەرىنىڭ سپورت الەمىندەگى جانە ومىرلەرىندە قىزىقتى وقيعالارىمەن سىر شەرتىسىپ، پىكىر الىستى.
شىعىس قازاقستان وبلىسى، جارما اۋدانى، گەورگيەۆكا اۋىلىندا دۇنيەگە كەلگەن داڭقتى بالۋان جاستايىنان ءۇيدىڭ شارۋاسىنا ارالاسىپ وسكەندىكتەن ەڭبەكقور بولىپ ءوستى.
مۇنان سوڭ بوزكىلەمدەگى العاشقى بەلدەسۋلەر مەن ك س ر و، ەۋروپا، الەم چەمپيوناتتارى مەن سەۋل، بارسەلونا، اتلانتا وليمپيدالارىندا قول جەتكىزگەن جەتىستىكتەرىمەن ءبولىستى. سونداي-اق، داۋلەت تۇرلىحانوۆ سۇيگەن جارى، جەرلەسىمىز، ق ر گاندبول فەدەراتسياسىنىڭ پرەزيدەنتى، ازيا گاندبول فەدەراتسياسىنىڭ كەڭەس مۇشەسى گۇلنار تۇرلىحانوۆامەن تانىسىپ، جانۇيا قۇرعانداعى، دۇنيەگە ۇل-قىزدارى كەلگەندەگى قىزىقتى ساتتەرىمەن ءبولىستى.
249№ مەكتەپ-ليتسەيدىڭ ءبىر توپ داۋلەت ەسىمدى وقۋشىلارى ساحنا تورىنە شىعىپ، وسكەن سوڭ داڭقتى سپورتشىنىڭ اتىنا كىر كەلتىرمەي، ۇلكەن ازامات بولىپ وسەتىنىنە سەندىردى. سونىمەن قاتار، سپورتتىق سايىستاردا اۋدانىمىزدىڭ نامىسىن ابىرويمەن قورعاپ جۇرگەن ءبىلىم ورداسىنىڭ شاكىرتتەرى جەتكەن جەتىستىكتەرىمەن ءبولىسىپ، داۋلەت اعاسىنان باتا سۇرادى. ايدىن ءساندىباي جەرلەس اقىن رۇستەم جانايدىڭ «داۋلەت باتىر» داستانىنان ءۇزىندى وقىپ بەردى.
داۋلەت بولات ۇلى تاربيەلىك ءمانى زور شارانى ۇيىمداستىرۋشىلارعا ريزاشىلىعىن جەتكىزىپ، اۋدان اكىمى باحىت جاحانوۆقا ەستەلىك سىيلىقتارىن تارتۋ ەتتى. سونداي-اق، اۋدان سپورتشىلارىنىڭ بيىك بەلەستەردى باعىندىرۋىنا شىنايى تىلەكتەستىگىن ءبىلدىرىپ، اۋداندىق ءبىلىم بولىمىنە 100 مىڭ ا ق ش دوللارىن سىيعا تارتتى.
باس قوسۋ بارىسىندا ق ر ەسترادا جۇلدىزدارى تولقىن زابيروۆا مەن مەدەۋ ارىنبايەۆ جانە ونىڭ ونەردەگى شاكىرتى جانعالي ابىشيەۆ اننەن شاشۋ شاشىپ، كوپشىلىكتىڭ كوڭىلىن ءبىر كوتەرىپ تاستادى.
اۆتور: ەلۋباي اۋەزوۆ
