قازاقستاندا مۇناي ءوندىرۋ 100 ميلليون تونناعا جەتۋى مۇمكىن
بۇل تۋرالى بۇگىن پارلامەنت ءماجىلىسىنىڭ ەكولوگيا جانە تابيعاتتى پايدالانۋ كوميتەتىنىڭ كەڭەيتىلگەن وتىرىسىندا ەنەرگەتيكا ءمينيسترى ۆلاديمير شكولنيك ءمالىم ەتتى.
«قاشاعان» ماسەلەسىنە كەلسەك، قازىرگى تاڭدا كونسورتسيۋم وپەراتورى «نورت كاسپيان وپەرەيتينگ» اعىمداعى جىلدىڭ ءساۋىر ايىندا كەن ورنىنداعى قۇبىرلاردى تولىق اۋىستىرۋ قاجەتتىگىن ناقتىلادى. سوعان وراي، قۇبىرلاردى تولىق اۋىستىرۋ، سودان كەيىن مۇناي ءوندىرۋدى جاڭعىرتۋ 2016 - جىلدىڭ ەكىنشى جارتىسىنا نەمەسە ارى كەتكەندە 2016 - جىلدىڭ سوڭىنا قاراي كۇتىلەدى. ەگەر بارلىعى جوسپارعا ساي بولسا، وندا وسى مەزگىلدە كەن ورنىنان مۇناي وندىرەتىن بولامىز»، - دەدى ۆ. شكولنيك.
ونىڭ ايتۋىنشا، كەلەشەك جوبالاردى جۇزەگە اسىرىپ، تەڭىز كەن ورنىن كەڭەيتۋ جانە قاشاعان كەنىن يگەرۋدىڭ ورنىقتى دەڭگەيگە شىعۋى ەلىمىزدىڭ مۇناي سەكتورىنداعى پوزيتسياسىن ارتتىرا تۇسەدى. اتاپ ايتقاندا، 2023 - جىلعا قاراي قازاقستان جىلىنا 100 ميلليون توننا مۇناي وندىرۋگە قول جەتكىزە الادى.
توقتالا كەتەتىن جايت، «قاشاعان» جوباسى بويىنشا جوندەۋ- قالپىنا كەلتىرۋ جۇمىستارىنىڭ جالپى قۇنىن مەردىگەر كومپانيا شامامەن 1,6 ميلليارد دوللارعا باعالاعان، ال بالاما نۇسقا بويىنشا ونىڭ قۇنى 3,6 ميلليارد دوللار بولىپ وتىر.
اۆتور: قانات مامەتقازى ۇلى
