ۇلتتىق قوردان بولىنگەن 100 ميلليارد تەڭگە كاسىپكەرلەردىڭ قولىنا تيۋدە
ونىڭ اتاپ وتۋىنشە، اعىمداعى جىلى ۇكىمەت قىزمەتىنە نەگىزىنەن «قازاقستان-2050» ستراتەگياسىن جۇزەگە اسىرۋعا باعىتتالدى. قازاقستاننىڭ الەمنىڭ دامىعان وتىز ەلىنىڭ قاتارىنا قوسىلۋىن كوزدەيتىن ۇزاق مەرزىمدى ستراتەگياسىن ەسكەرە وتىرىپ، ۇكىمەت ستراتەگيالىق باعدارلامالىق قۇجاتتاردى تۇزەتىپ، ءبىرقاتار جاڭا مەملەكەتتىك جانە سالالىق باعدارلامالاردى قابىلدادى.
«الەمدىك ەكونوميكانىڭ باياۋلاۋى جانە گەوساياسي تاۋەكەلدەردىڭ تەرەڭدەۋى اياسىندا 2014- جىلعا ارنالعان الەۋمەتتىك-ەكونوميكالىق ساياساتتىڭ ءبىرىنشى كەزەكتى شارالارىنىڭ جول كارتاسى قابىلداندى. وندا نەگىزگى باسىمدىق ەكونوميكالىق وىسىمگە جاعداي جاساۋعا باعىتتالدى»، - دەدى ول.
ب. ساعىنتايەۆتىڭ سوزىنە قاراعاندا، ەڭ ءبىرىنشى كەزەكتە ەكونوميكالىق ءوسىمدى قامتاماسىز ەتەتىن جانە بيزنەستى قولداۋعا باعىتتالعان شارالار قابىلداندى. ەكونوميكانىڭ وسىمگە ەلباسى ن. نازاربايەۆتىڭ باستاماسىمەن ۇلتتىق قوردان بولىنگەن 1 ترلن. تەڭگە تىڭ سەرپىن بەردى.
«بۇگىنگى تاڭدا ەكونوميكانىڭ باستى سالالارىنداعى ينۆەستيتسيالىق جوبالار ايقىندالدى. ولاردىڭ الدىن الا سوماسى 5,5 ميلليارد دوللاردى قۇرايدى. شاعىن جانە ورتا بيزنەستى قولداۋ ءۇشىن ۇلتتىق قوردان بولىنگەن ءبىرىنشى ءجۇز ميلليارد تەڭگە قازىرگى ۋاقىتتا كاسىپكەرلەردىڭ قولىنا تيۋدە. بانكتەرمەن جالپى سوماسى 70 ميلليارد تەڭگەنى قۇرايتىن 327 جوبا ماقۇلداندى»، - دەدى ب. ساعىنتايەۆ.
اۆتور: مارلان جيەمباي
