14:25, 17 - شىلدە 2014 | GMT +5
قازاقستاندىقتار 100 توننا مىستى رەسەيگە زاڭسىز الىپ وتپەك بولدى
استانا. قازاقپارات - قازاقستان - رەسەي شەكاراسىندا قازاقستاندىق شەكاراشىلار سالماعى 100 تونناعا جۋىق ءتۇستى مەتالدى (مىس) زاڭسىز تۇردە وتكىزبەك بولعانداردىڭ جولىن كەستى. بۇل تۋرالى ق ر ۇ ق ك ش ق باسپا ءسوز قىزمەتىنەن حابارلاندى.
اقتوبە شەكارا وتريادىنا قاراستى «جايساڭ» وتكىزۋ باقىلاۋ بەكەتىنىڭ باقىلاۋشىلارى «قاراعاندى -ورىنبور» باعىتىندا سالماعى 100 تونناعا جۋىق ءتۇستى مەتالل - مىس كەسەكتەرىن جۇك ماشيناسىنا ارتىپ كەلە جاتقان ەلىمىزدىڭ 5 ازاماتىن ۇستادى.
تەكسەرە كەلگەندە جۇكتى وڭدەۋگە قازاقستان رەسپۋبليكاسىنان الىپ وتۋگە بەرىلەتىن مەملەكەتتىك ليتسەنزياسى بولماي شىقتى. جۇكتىڭ الدىن الا ەسەپتەگەندەگى قۇنى 120 ميلليون تەڭگەنى قۇراپ وتىر.
الدىن الا تەرگەۋدەن كەيىن اتالعان جۇك قارجى پوليتسياسىنىڭ اقتوبە وبلىسى بويىنشا دەپارتامەنتىنە بەرىلدى.
اۆتور: رۋسلان عابباسوۆ
