شىڭجاندا بالالاردى فۋتبولعا باۋليتىن 1000 بالاباقشا اشىلادى - شەتەلدەگى قازاق باسپا ءسوزى

نۇر- سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

شىڭجاندا بالالاردى فۋتبولعا تاربيەلەيتىن 1000 بالاباقشا اشىلادى - CNR

قىتايدىڭ شىڭجان ولكەسىندە فۋتبولعا بەيىمى بار، تالانتتى بالالاردى تاربيەلەيتىن 1000 بالاباقشا اشىلادى، دەپ حابارلايدىڭ قىتايدىڭ ورتالىق حالىق راديوسى.

اتالعان ب ا ق- تىڭ جازۋىنشا، شىڭجان ۇيعىر اۆتونوميالى ولكەسىنىڭ سپورت جانە دەنە شىنىقتىرۋ ىستەرى كوميتەتىنىڭ قولداۋىمەن بيىل ءۇرىمجى، سانجى، حوتان، قاشقار، اقسۋ ايماقتارىندا تالانتتى بالالاردى فۋتبولعا ارنايى تاربيەلەيتىن 1000 بالاباقشا اشۋ جوسپارلانعان. جەرگىلىكتى بيلىك وسىلايشا فۋتبولعا بەيىمى بار تالانتتى بالالاردى 3-6 جاسىنان باستاپ ىرىكتەپ الىپ، بولاشاق سپورتشىلاردى بالاباقشا قابىرعاسىنان تاربيەلەپ، ەل نامىسىن قورعايتىن كەلەشەك فۋتبول جۇلدىزدارىن دايارلاپ شىعۋعا نيەتتەنىپ وتىر.

داۋلەت تۇرلىحانوۆ ۇلانباتىردا وتەتىن حالىقارالىق شاراعا قاتىسادى - Kaznews

19-24 - ءساۋىر ارالىعىندا موڭعوليا استاناسى ۇلانباتىر قالاسىندا كۇرەس تۇرلەرىنەن ازيا بىرىنشىلىگى وتەدى، دەپ جازادى موڭعوليانىڭ Kaznews اقپارات پورتالى.

«قازاقستان رەسپۋبليكاسىنىڭ موڭعولياداعى ەلشىلىگىنىڭ حابارلاۋىنشا، بۇل حالىقارالىق ءىس- شاراعا قازاقستان رەسپۋبليكاسىنىڭ 53 سپورتشىسى جانە UWW بيۋروسىنىڭ مۇشەسى، قازاقستاننىڭ ايگىلى پالۋانى داۋلەت تۇرلىحانوۆ قاتىسادى. اتالعان حالىقارالىق جارىس ۇلانباتىر قالاسىنىڭ «بۋيانت- ۋحاا» سپورت سارايىندا وتكىزىلەدى»، - دەپ جازادى Kaznews اقپارات پورتالى.

ەستەرىڭىزگە سالا كەتەلىك، داۋلەت تۇرلىحانوۆ - الەم چەمپيونى (1989 ج.)، الەم چەمپيوناتىنىڭ كۇمىس جۇلدەگەرى (1993 ج.)، ەۋروپا چەمپيونى (1987 ج.)، ازيا چەمپيونى (1995 ج.)، وليمپيادا ويىندارىنىڭ كۇمىس (1988 ج.) جانە قولا (1992 ج.) جۇلدەگەرى، ك س ر و- نىڭ جەتى دۇركىن چەمپيونى، الەم كۋبوگىنىڭ ەكى دۇركىن يەگەرى، ك س ر و حالىقتار سپارتاكياداسىنىڭ جەڭىمپازى (1991 ج.) ، ازيا ويىندارىنىڭ جەڭىمپازى (1994 ج. ). پەداگوگيكا عىلىمدارىنىڭ كانديداتى. قازاقستان كۇرەس فەدەراتسياسىنىڭ قۇرمەتتى پرەزيدەنتى جانە فيلا بيۋروسىنىڭ مۇشەسى.

يراندا مەشىت قابىرعاسىنان مىرزا ۇلىقبەك پەن الىشەر ناۋاي جازبالارى تابىلدى – ءو ز ا

يراننىڭ تايناباد قالاسىنداعى مەشىت قابىرعاسىنان مىرزا ۇلىقبەك پەن الىشەر ناۋايدىڭ جازۋلارى تابىلدى، دەپ جازادى وزبەكستاننىڭ ءو ز ا مەملەكەتتىك اقپارات اگەنتتىگى.

بۇل دەرەك مادەني مۇرا اگەنتتىگى ديرەكتورىنىڭ ءبىرىنشى ورىنباسارى تۋرسۋنالي كۋزيەۆ باستاعان دەلەگاتسيانىڭ يرانعا جۇمىس ساپارى بارىسىندا ءمالىم بولدى.

«يراننىڭ سولتۇستىك- باتىسىندا تيمۋريدتەر ءداۋىرىنىڭ كوپتەگەن مادەني مۇرالارى بار. ءامىر تەمىر يراننىڭ تايناباد قالاسىندا شەيح ءابۋ باكىر زەين- ۋل وبيددين تاييبينيمەن كەزدەسىپ، ونىمەن جاقسى قارىم- قاتىناس ورناتىپ، ۇزاق جىلدار بويى حات الىسىپ تۇرادى. وسى دوستىقتىڭ سيمۆولى رەتىندە ءامىر تەمىردىڭ ۇلى شاحرۋح مىرزا تايىنابادتا مەشىت سالدىرعان. مەشىت بۇگىنگى كۇنگە دەيىن ساقتالىپ، ونىڭ قابىرعاسىندا جوعارى مارتەبەلى قوناقتارعا ارنالعان قۇرمەت تاقتاسى بار بولعان جانە وعان قوناقتار ءوز تىلەگىن نەمەسە جازبالارىن قالدىرعان»، - دەيدى تۋرسۋنالي كۋزيەۆ.

ونىڭ ايتۋىنشا، وسى جازبالارمەن تانىسۋ كەزىندە ميرزو ۇلىقبەك پەن الىشەر ناۋايدىڭ جازۋلارى بار ەكەنى بەلگىلى بولعان. قازىرگى كەزدە ۇلى عۇلامالاردىڭ قولجازبالارىن عىلىمي تۇرعىدان زەرتتەۋ جۇمىستارى ءجۇرىپ جاتىر.

دۇيسەن قاسەيىنوۆ مىندەتىن سۇلتان رايەۆكە تاپسىردى - TRT

تۇركى مادەنيەتىن جانە ونەرىن دامىتۋ حالىقارالىق ۇيىمىنىڭ (تۇركسوي) باس حاتشىسى بولىپ سايلانعان سۇلتان رايەۆ ەل استاناسى انكارادا سالتاناتتى تۇردە دۇيسەن قاسەيىنوۆتەن مىندەتتى قابىلداپ الدى، دەپ حابارلايدى تۇركيا راديو تەلەۆيزيا پورتالى.

«مىندەتتى تاپسىرۋ راسىمىنە ت ر سىرتقى ىستەر ءمينيسترى ميەۆلۇت چاۆۋشوعلۋ، ت ر مادەنيەت جانە تۋريزم ءمينيسترى مەحمەت نۋري ەرسوي، كوپتەگەن ەلشىلەر مەن قوناقتار قاتىستى. دۇيسەن قاسەيىنوۆ قىزمەتتىك مىندەتىن تاپسىرار الدىندا سويلەگەن سوزىندە 31- ناۋرىزدا وتكەن تۇركسوي تۇراقتى كەڭەسىنىڭ وتىرىسىندا قابىلدانعان شەشىممەن 14 جىل بۇرىن العان مىندەتىن رايەۆقا ماقتانىشپەن تاپسىراتىنىن ايتتى. سىرتقى ىستەر ءمينيسترى چاۆۋشوعلۋ دا تۇركسوي- دىڭ تۇركى الەمىن تاعى ءبىر رەت بىرىكتىرگەنىن ايتتى. ول قاسەيىنوۆتىڭ باس حاتشىلىق قىزمەتى بىتسە دە، تۇركى الەمىنە قىزمەتىنىڭ اياقتالمايتىنىن ايتتى» دەپ جازادى TRT.

يران مەن قازاقستان اراسىنداعى اۋە رەيستەرى قايتا جانداندى – فارس

ەكى جىل بۇرىن COVID-19 ورشۋىنە بايلانىستى توقتاتىلعان ي ي ر مەن قازاقستاننىڭ اۋە رەيستەرى الداعى بىرنەشە كۇندە قايتا باستالادى، دەپ حابارلايدى يراننىڭ Parstoday اقپارات اگەنتتىگى.

«قازاقستان اۆياتسيا كوميتەتىنىڭ مالىمەتىنشە، بيىلعى جىلدىڭ 20- ساۋىرىنەن باستاپ يراندىق «كيش ەير» اۋە كومپانياسى اپتا ىشىندە «تەھران- الماتى- تەھران» جانە «گورگان- اقتاۋ- گورگان» باعىتتارى بويىنشا ءوزىنىڭ تۇراقتى حالىقارالىق رەيستەرىن ورىندايدى. رەيستەر سارسەنبى (گورگان- اقتاۋ- گورگان) جانە بەيسەنبى (تەگەران- الماتى- تەگەران) كۇندەرى ورىندالادى»، - دەپ جازادى Parstoday اقپارات اگەنتتىگى.

اۆتور: باقىتجول كاكەش