ۋكرايناعا 1000 توننادان استام قارۋ جەتكىزىلدى
ولار لۋگانسك پەن دونباسس وڭىرىندەگى احۋالدى كورمەك. ەۋروپا ەلدەرىنىڭ ۆەدومستۆو باسشىلارى كييەۆكە دە بارادى دەپ جوسپارلانعان.
ۋكراينا كارى قۇرلىقتان قانداي كومەك كۇتەدى؟
2014 -جىلدان بەرى ۋكراينا قۇرامىنداعى دونەتسك جانە لۋگانسك وبلىستارىنىڭ ءبىر بولىگى رەسمي كييەۆكە باعىنۋدان باس تارتقان، سوندىقتان 8 جىلدان بەرى ەل شىعىسىنداعى سوعىس ءالى توقتاعان جوق. دونباسس وڭىرىندەگى 4 ميلليونعا جۋىق ادامنىڭ بولاشاعى ءالى دە بۇلىڭعىر. كەمىندە ءبىر جارىم ميلليون بەيبىت تۇرعىن ءۇي- جايىن تاستاپ، بوسىپ كەتۋگە ءماجبۇر بولدى.
«وسىناۋ قيىن جاعدايدىڭ ءبارىن ەۋروپا مەملەكەتتەرىنىڭ وكىلدەرى ءوز كوزىمەن كورۋى ءتيىس»، - دەيدى ۋكراينا ديپلوماتياسىنىڭ باسشىسى.
دۇيسەنبى كۇنى اۆستريا، سلوۆاكيا، چەحيا ەلدەرىنىڭ سىرتقى ىستەر مينيسترلەرى لۋگانسك وڭىرىنە ارنايى كەلدى، بۇگىن ولاردىڭ ساپارى كيەۆكە جوسپارلانعان.
دميتري كۋلەبا، ۋكراينانىڭ سىرتقى ىستەر ءمينيسترى:
- جوعارى مارتەبەلى شەتەلدىك دەلەگاتسيالاردىڭ ۋكرايناعا ساپارى، ەڭ الدىمەن، رەسەيمەن جاعدايدىڭ شيەلەنىسۋىنەن قورعايدى. كورشى ەلمەن قارىم- قاتىناسىمىز كۇردەلى جانە قاۋىپ باسىم. دەي تۇرعانمەن، قازىر كيەۆ الەمدىك ساياساتتىڭ نازارىندا، ءارى قاراي دا جاعداي تۇراقتى جانە باقىلاۋدا بولادى دەگەن ۇمىتتەمىز.
ۋكراينانىڭ سىرتقى ىستەر ءمينيسترى دميتري كۋلەبانىڭ مالىمەتى بويىنشا تەك سوڭعى اپتالاردا ەلگە جەتكىزىلگەن قورعانىس قارۋى مەن اسكەري تەحنيكانىڭ جالپى سالماعى 1000 توننادان اسقان. مۇنداي تەحنيكانىڭ جالپى قۇنى ءبىر جارىم ميلليارد دوللارعا باعالانادى، - دەدى مينيستر.
ءوز كەزەگىندە كيەۆ تۇرعىندارى امەريكا، كانادا، ۇلى بريتانيا مەن پولشادان كەلگەن اسكەري كومەك ءدال قازىر ۋكرايناعا قاجەت دەپ قابىلدايدى. ەلگە توننالاپ جەتكىزىلگەن قارۋدان بولەك، ۋكراينا استاناسى كيەۆتە العاش رەت ءبىر مەزگىلدە 9 باتالون قاتىسقان 112 اۋماقتىق قورعانىس بريگاداسىنىڭ وقۋ- جاتتىعۋى وتكىزىلدى. قاتىسۋشىلار راديوتەحنيكالىق قۇرالداردىڭ جۇمىس ىستەۋ نەگىزدەرىن جانە حابارلامالاردى شيفرلاۋدى ۇيرەندى. سونداي- اق جەكە جاۋىنگەرلىك داعدىلار مەن تاكتيكا ءارى جارىلعىش قۇرىلعىلارمەن جۇمىس ىستەۋدىڭ نەگىزگى ەرەجەلەرىمەن تانىستى.
www.24.kz
