ۇلتتىق بانك 1000 تەڭگەلىك بانكنوتقا قاتىستى تۇسىنىكتەمە بەردى
«ونى بانكتىك وپەراتسيالار مەن اۋدارىمدار بويىنشا بارلىق تولەمدەردە قابىلداۋعا مىندەتتى. بۇل بانكنوت «قازپوشتا» ا ق بولىمشەلەرى مەن بارلىق بانكتە ايىرباستالىپ، ەش شەكتەۋسىز قابىلدانادى»، - دەلىنگەن حابارلامادا.
«كۇلتەگىن» تۇركى جازبا ەسكەرتكىشىنە ارنالعان نومينالى 1000 تەڭگەلىك بانكنوت 2013 -جىلدىڭ سوڭىندا 20 ميلليون دانا تارالىممەن اينالىمعا شىقتى. بۇل بانكنوتتار تابيعي توزۋ شاماسىنا قاراي اينالىمنان الىنادى. ەگەر كاسىپكەرلەر بۇل بانكنوتتى قابىلداۋدان باس تارتسا، ا ق ك- نىڭ 206-بابىنا سايكەس ەسكەرتۋ جاسالادى. اكىمشىلىك جازا قولدانىلعاننان كەيىن بىر جىل ىشىندە قايتالانعان جاعدايدا – 5 تەن 25 ايلىق ەسەپتىك كورسەتكىشكە دەيىن ايىپپۇل سالىنادى. وسى بانكنوتتى قابىلداۋدان باس تارتقان جاعدايدا ءتيىستى شارالار قابىلداۋ ءۇشىن ۇلتتىق بانكتىڭ اۋماقتىق فيليالىنا ءوتىنىش جاساۋ قاجەت. ودان بۇرىن فاكتىنى بەينەتاسپاعا جازىپ الۋدى نەمەسە بانكنوتتى قابىلداۋدان باس تارتاتىنى تۋرالى جازباشا نەگىزدەمە تالاپ ەتۋدى ۇسىنامىز، - دەلىنگەن بانك حابارلاماسىندا.
