كوروناۆيرۋس: يتاليادا ۆيرۋستان كوز جۇمعاندار سانى 1000 ادامنان استى
ريم. قازاقپارات - سوڭعى مالىمەتتەر بويىنشا، ۆيرۋس يتاليادا 1016 ادامنىڭ ءومىرىن قيعان.
بۇل تۋرالى بەيسەنبى كۇنى يتاليانىڭ ازاماتتىق قورعانىس قىزمەتىنىڭ باسشىسى اندجەلو بوررەللي ءمالىم ەتتى. بۇل سارسەنبى كۇنگىمەن سالىستىرعاندا 189 جاعدايعا كوپ، دەپ حابارلايدى قازاقپارات يتاليانىڭ ANSA اگەنتتىگىنە سىلتەمە جاساپ.
ونىڭ ايتۋىنشا، قازىرگى ۋاقىتتا يتاليادا كوروناۆيرۋس جۇقتىرعاندار سانى 12839 ادامعا جەتتى. بۇل سارسەنبى كۇنى تىركەلگەن دەرەكتەرمەن سالىستىرعاندا 2249 جاعدايعا كوپ. 1258 ادام ەمدەلىپ شىقتى.
كوروناۆيرۋستان كوز جۇمعاندار مەن ەمدەلىپ شىققانداردى قوسا ەسەپتەگەندە ۆيرۋس جۇقتىرعانداردىڭ جالپى سانى 15113 ادامعا جەتتى. ۆيرۋس جۇقتىرعانداردىڭ 6896 سى لومبارديادا ەكەنى انىقتالعان، ولاردىڭ 774 ءى قايتىس بولدى. ال ەميليا- رومانيا ايماعىندا 1758 جاعداي تىركەلگەن، 146 سى كوز جۇمعان.
بۇعان دەيىن حابارلاعانداي، 12- ناۋرىزدان باستاپ يتاليادا ءدارىحانالار مەن ازىق-تۇلىك دۇكەندەرىنەن وزگە ساۋدا ورىندارىنىڭ بارلىعى جابىلىپ جاتىر.
