قىتايدا كوروناۆيرۋستان كوز جۇمعاندار سانى 1000 نان استى

بەيجىڭ. قازاقپارات - قىتايدا كوروناۆيرۋستىڭ جاڭا تۇرىنەن مەرت بولعاندار سانى 1016 عا جەتتى، دەپ حابارلايدى قازاقپارات ءتىلشىسى.

ق ح ر دەنساۋلىق ساقتاۋ ىستەرى بويىنشا مەملەكەتتىك كوميتەتىنىڭ حابارلاۋىنشا، وتكەن تاۋلىكتە (10- اقپانداعى جاعداي بويىنشا) قىتايدا كوروناۆيرۋس جۇقتىرعان 2478 ادام تىركەلىپ (حۋبەي پروۆينتسياسىندا - 2097)، 108 ءى ولىممەن اياقتالدى (حۋبەي - 103).

سوڭعى مالىمەتتەر بويىنشا، ق ح ر- دا ىندەتتى جۇقتىرعانداردىڭ جالپى سانى 42634 ادامعا جەتىپ، 1016 ناۋقاس قازا تاپتى. 3996 ادام ساۋىعىپ، اۋرۋحانادان شىعارىلدى.

رەسمي ستاتيستيعا سايكەس، ەپيدەميا وشاعى حۋبەي پروۆينتسياسىنان باسقا ايماقتاردا ىندەتتى جۇقتىرۋ وقيعاسى جەتىنشى كۇن قاتارىنان ازايىپ جاتىر.

قازاقستانمەن شەكارالاس شىڭجان-ۇيعىر اۆتونومدى اۋدانىندا كوروناۆيرۋستىڭ جاڭا ءتۇرىن جۇقتىرعان 55 ناۋقاس تىركەلدى. ونىڭ ىشىندە ىلە-قازاق اۆتونومدى ايماعىندا – 10، اۋداننىڭ اكىمشىلىك ورتالىعى ءۇرىمجى قالاسىندا 20 ادام ىندەت جۇقتىرعان.

قازىرگى ۋاقىتتا اتالعان ايماقتاعى 3842 ادام دارىگەرلەردىڭ تۇراقتى باقىلاۋىندا.