وتىراردا 1000 ادامدىق جاڭا مەشىت پايدالانۋعا بەرىلدى
«ەسەن انا» دەپ اتالاتىن مەشىتتى سالتاناتتى تۇردە اشىپ، ەل يگىلىگىنە بەرۋگە قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي سەرىكباي قاجى وراز ارنايى قاتىستى.
«ۇلىق اللانىڭ قالاۋىمەن بىزدەر وتىرار اۋدانىندا مۇسىلمان بالاسىنىڭ قاجەتتى دۇعا- تىلەكتەرىن ءبىر اللا تاعالادان عانا سۇرايتىن، پەندەلىك قاتەلىكتەرى ءۇشىن كەشىرىم سۇراپ، تاۋبەگە كەلەر مەكەنى ءزاۋلىم مەشىتتىڭ اشىلۋ سالتاناتىنىڭ كۋاسى بولىپ وتىرمىز. كۇمبەزى ۇزاقتان كوز تارتاتىن مەشىتتەر قاي تۇرعىدان الساق تا، ءار پەندەگە جاقسى وي مەن ىزگىلىكتى امالداردى ەسكە سالاتىنى بەلگىلى. مەشىتتەن اتتاپ وتۋگە ەشكىمنىڭ جۇرەگى داۋالامايتىنى دا سوندىقتان. ەندەشە، جاڭا مەشىت يماندىلىقتىڭ تەمىرقازىعىنا اينالسىن»، - دەگەن باس ءمۇفتي مەشىتكە قاسيەتتى قۇران كىتابىن سىيعا تارتتى.
«ەسەن انا» مەشىتىن وتىرارلىق كاسىپكەر وسكەنباي ۇسەنوۆ ءوز قارجىسىنا سالدىرىپ، حالىققا تارتۋ ەتتى. وسىلايشا ەلباسى نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنداعى «تۋعان جەر» باعدارلاماسى اياسىندا قولعا الىنعان «تۋعان جەردى تۇلەتۋ - پەرزەنتتىك پارىز» اكسياسى اۋداننىڭ الەۋمەتتىك الەۋەتىنىڭ ارتۋىنا ۇلەس قوسىپ جاتىر.
«ۇلت كوشباسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى حالقىمىزدىڭ رۋحاني قۇندىلىقتارىن قايتا تۇلەتىپ، ەلدىڭ ەڭسەسىن كوتەرگەن باعدارلى داڭعىل جولىمىزعا اينالدى. مىنە، وسى ماقالانىڭ «تۋعان جەر» جوباسى اياسىندا اۋدانىمىزدا اۋقىمدى يگى جۇمىستار جۇزەگە اسىپ كەلەدى. اۋداننان تۇلەپ ۇشقان كاسىپكەرلەر وتىراردىڭ الەۋمەتتىك- ەكونوميكالىق، مادەني- رۋحاني دامۋىنا وزىندىك ۇلەسىن قوسىپ، قولتاڭبالارىن قالدىرۋدا. سونىڭ ءبىرى - وسى «ەسەن انا» مەشىتى. يماندىلىق پەن ىزگىلىككە ەسىگىن ايقارا اشقان مەشىت يگى ىستەردىڭ باستاماسى بولسىن»، - دەدى وتىرار اۋدانىنىڭ اكىمى ەرلان ايتاحانوۆ.
شارا بارىسىندا جيىلعان جۇرت مەشىتتە ناماز وقىدى.
