سۋرەتشىلەر الماتىنىڭ 1000 جىلدىعىنا تارتۋ جاسادى - فوتو

استانا. قازاقپارات - الماتىدا «ۇلى دالا بوياۋلارى» اتتى سۋرەتشىلەردىڭ حالىقارالىق سيمپوزيۋمىنىڭ جۇمىسى قورىتىندىلانىپ، «مەگا» ويىن-ساۋىق ورتالىعىندا پلەنەرلىك جۇمىستاردىڭ كورمەسى ءوتتى.

بۇل تۋرالى «قىزدار ۋنيۆەرسيتەتى» مەديا ورتالىعىنان حابارلادى.

كورمەگە ءوز ەلىمىزبەن قاتار، رەسەي، كورەيا، پولشا، ارمەنيا، قىرعىزستان، ۆەنگريا، فينليانديا جانە ت. ب. 12 ەلدەن باس قوسقان 30 دان استام قىلقالام شەبەرلەرى مەن فوتوسۋرەتشىلەردىڭ 60 قا جۋىق تۋىندىلارى قويىلدى.

ەسكە سالا كەتەيىك، سيمپوزيۋم 26- تامىز كۇنى باستاۋ العان بولاتىن. سيمپوزيۋم بارىسىندا سۋرەتشىلەر مەن فوتوسۋرەتشىلەر «كولساي كولدەرى» مەملەكەتتىك ۇلتتىق تابيعي پاركىندە، شارىن شاتقالىندا، «تاڭبالى تاس» قورىعىندا، ءۇشقوڭىردا، الاتاۋ بوكتەرىندە جانە ت. ب. الماتى جانە الماتى وبلىسىنىڭ كورىكتى جەرلەرىندە بولىپ، ۇلى دالا - قازاق ەلىنىڭ اسەم جەرلەرى مەن تابيعاتىن، ءار تاۋى مەن دالاسىن سۋرەتكە ءتۇسىرىپ، عاجاپ كورىنىسىن ءار قىرىنان سالدى. شەتەلدىك قوناقتار قازاق جەرىنىڭ اسەم ورىندارىن تاماشالاۋمەن قاتار، ساياباقتار مەن قورىقتاردىڭ تاريحىمەن، وسىمدىكتەرى مەن جانۋارلار دۇنيەسىمەن دە تانىسىپ، كورىگىنە تامسانىپ، ساياحات جاساپ قايتتى.

كورمەنىڭ اشىلۋىندا اتالمىش شارانىڭ ۇيىمداستىرۋشىسى، قازاق مەملەكەتتىك قىزدار پ ۋ رەكتورى دينار نوكەتايەۆا: «قازاقستاننىڭ قاي ءوڭىرىن المايىق، تۇنىپ تۇرعان ءىنجۋ-مارجان. تابيعاتى ءار الۋان ەلىمىزدە جازىق دالا دا، ورمان دا، تاۋ دا، وزەن دە، كول دە، ءشولدى ايماقتار دا بار. كوزدىڭ جاۋىن الار اسەم تابيعاتىمىز كەز كەلگەن ادامدى، كەز كەلگەن ساياحاتشىنى تاڭ قالدىرماي، تاڭداي قاقتىرماي قويمايدى. مۇندا كوك اسپانمەن تالاسقان اسەم تاۋلار، تاپ-تازا بۇلاقتار مەن وزەندەر، نۋ ورماندار، سان الۋان وسىمدىكتەر مەن اڭ-قۇستار بار.

قانشا جىلدار وتسە دە، داۋىرلەر داۋرەنىنەن سىر شەرتەتىن يگىلىكتەر جالعاسى ۇزىلگەن ەمەس. بۇگىنگى كورمەدە شەتەلدىك سۋرەتشىلەرمەن قاتار، قازاقستاندىق سۋرەتشىلەردىڭ دە تىڭ تۋىندىلارى قويىلىپ وتىر. قازاق دالاسىنىڭ اسەم بەينەسىن، كوركەمدىگى مەن كەرەمەتتىلىگىن كەنەپكە تۇسىرگەن ناعىز تالانتتار - قىلقالام شەبەرەلەرىنىڭ سۋرەتتەرى تاريحىمىزعا قوسقان ۇلكەن ۇلەس پەن الماتى قالاسىنىڭ 1000 جىلدىعىنا ۇلكەن تارتۋ بولماق. سىزدەرگە مول شىعارماشىلىق تابىس تىلەي وتىرىپ، شەكسىز العىسىمىزدى بىلدىرەمىز!» - دەدى.

كورمەنىڭ اشىلۋىنا سونىمەن قاتار، «Astana Group» كومپانياسىنىڭ پرەزيدەنتى، ەلىمىزدىڭ ءىرى قالالارىندا اشىلعان «مەگا» ويىن-ساۋىق ورتالىقتارىنىڭ باسشىسى، بەلگىلى كاسىپكەر نۇرلان سماعۇلوۆ، «قازاقستان حالىق بانكى» ا ق- نىڭ ديرەكتورلار كەڭەسىنىڭ ءتوراعاسى الەكساندر پاۆلوۆ ارنايى قاتىسىپ، قىلقالام شەبەرلەرىنىڭ كورمەسىن تاماشالادى. سۋرەتشىلەردىڭ تۋىندىلارىنا جوعارى باعا بەرگەن قوناقتار، كورمەدەن ەرەكشە اسەر العاندىقتارىن اتاپ ءوتتى.

«مەن قاشاندا بەينەلەۋ، سۋرەت ونەرىن قادىرلەيمىن، ءارقاشاندا قولدايمىن. الماتى قالاسىنىڭ 1000 جىلدىعىنا ورايلاستىرىلىپ وتىرعان بۇل شاراعا ءبىز دە اتسالىسىپ، جۇرتشىلىققا تانىتۋعا ۇلەس قوسىپ وتىرعانىمىزعا قۋانىشتىمىز. بىرىنەن-ءبىرى ەرەكشەلەنەتىن سۋرەتتەردىڭ بارلىعى كوڭىلىمنەن شىقتى، ەرەكشە اسەر الدىم»، - دەگەن كاسىپكەر، ونەر جاناشىرى، كوللەكتسيونەر نۇرلان سماعۇلوۆ سۋرەتشىلەردىڭ تۋىندىلارىن ويىن-ساۋىق ورتالىعىندا ساتىلىمعا قويۋدى ۇسىندى. اتاپ وتە كەتەيىك، ەلىمىزگە بەلگىلى ەكى تۇلعا كورمەنى تەگىن وتكىزۋگە جانە ۇيىمداستىرۋعا مۇرىندىق بولدى.

ءبىر اپتاعا جالعاساتىن كورمەگە كەلۋشىلەر سۋرەتشىلەردىڭ تۋىندىلارىن تاماشالاپ قانا قويماي، ساتىپ الۋعا دا مۇمكىندىك الا الادى. كورمەگە پلەنەردە سالىنعان سۋرەتتەرمەن قاتار، قىلقالام شەبەرلەرىنىڭ بوياۋى كەپپەگەن تۋىندىلارى دا قويىلدى. فوتوسۋرەتشىلەر دە ءوز ەلدەرىنەن الا كەلگەن تاڭداۋلى دەگەن ءوز سۋرەتتەرىن ونەرسۇيەر قاۋىم نازارىنا ۇسىندى.

شارا سوڭىندا سيمپوزيۋمعا قاتىسقان سۋرەتشىلەر سەرتيفيكاتتارمەن جانە ارنايى ديپومدارمەن ماراپاتتالدى.