قازاقستانداعى تۇرىك ەتنو مادەني ورتالىعى 1000 وزگە ۇلت جاستارىنا مەملەكەتتىك ءتىلدى ۇيرەتۋدى قولعا الماق

بۇل تۋرالى قازاقپارات تىلشىسىنە بۇگىن اسسامبلەيا جىلىنىڭ اشىلۋى بارىسىندا تۇرىك ەتنومادەني ورتالىعى ءتوراعاسى، ق ح ا مۇشەسى قازاقباي قاسيموۆ ايتتى.

قازاقستان حالقى اسسامبلەياسى جىلى اياسىندا «مىڭ بالا» جوباسى بويىنشا ءبىر جىل ىشىندە قازاقستاندا تۇراتىن 1000 وزگە ۇلت وكىلدەرىنىڭ جاستارىن مەملەكەتتىك تىلگە وقىتۋ قولعا الىنباق.

«مىڭ بالا جوباسىنىڭ نەگىزگى ماقساتى - قازاقستانداعى ۇلتتار مەن ۇلىستاردىڭ بالالارىن مەملەكەتتىك تىلگە وقىتىپ، مارتەبەسىن بويلارىنا ءسىڭىرۋ. اسسامبلەيا اياسىندا 15 ەتنو مادەني ورتالىقتاردىڭ جەكسەنبىلىك مەملەكەتتىك تىلدەردى ۇيرەتۋ ساباقتارى وتەدى. بيىل تۇرىك ەتنومادەني ورتالىعى 1000 بالانى وقىتۋ تۋرالى الدىنا ماقسات قويىپ وتىر. ءبىزدىڭ قوعامدا ودان باسقا جىل سايىن قازاق ءتىلى بىلگىرلەرىنىڭ وليمپياداسىن وتكىزەمىز.

وسىدان 2 جىل بۇرىن 80 قاتىسۋشى بولدى. وتكەن جىلى 130، سوڭعى جىلى 170 تۇرىك بالالارى مەملەكەتتىك ءتىلدى ۇيرەندى. ۇزدىك شىققاندارعا سىيلىق، گراموتا، اقشالاي سىياقى بەردىك. بۇل ەتنوستاردى مەملەكەتتىك ءتىلدى ۇيرەنۋگە ىنتالاندىرۋعا، ەل يگىلىگىنە باعىتتالعان جۇمىستار. ءبارىمىزدى بىرىكتىرىپ وتىرعان قازاق ەلى عوي»، - دەدى قازاقباي قاسيموۆ.

ونىڭ ايتۋىنشا، قازاقستاننىڭ قۋاتى مەن كۇشى - جۇزدەگەن ۇلىستاردى ايرانداي ۇيىتىپ وتىرعان بىرلىگى مەن تاتۋلىعىندا.

 «بۇگىن مەن سالتاناتتى تۇردە ايتا الامىن. ءبىزدىڭ بىرلەستىك مەملەكەت باسشىسى نۇرسۇلتان نازاربايەۆتىڭ ساياساتىن قولداپ، قازاقستاننىڭ ەكونوميكاسى مەن ونەرىنىڭ، مادەنيەتىنىڭ دامۋىنا ءوز ۇلەسىن قوسۋعا بارىن سالادى»، - دەدى ق. قاسيموۆ.

اۆتور: گۇلميرا عوسمانالي