الماتىنىڭ 1000 جىلدىعىنا وراي، «مەدەۋ» ساياباعىندا 1000 ءتۇپ اعاش كوشەتتەرى وتىرعىزىلدى - فوتو
ءىس- شاراعا 500 دەن استام ادام: «مەدەۋ» ساياباعىنىڭ قىزمەتكەرلەرى، ستۋدەنت جاستار، ۆولونتەرلەر، جاستار ۇيىمدارىنىڭ بەلسەندىلەرى، سونداي-اق، الماتى قالالىق ءماسليحاتىنىڭ دەپۋتاتى، جاس اكتەر اسىلحان تولەپوۆ باستاعان جاس انشىلەر مەن تەاتر جانە كينو اكتەرلارى قاتىستى.
«بۇل شارا الماتى قالاسىنىڭ 1000 جىلدىق مەرەيتويىنا ارنالىپ وتىر. ماقساتىمىز - قالانىڭ ىشكى جاعىن جانە اينالاسىن جاسىل جەلەككە تولتىرۋ. ويتكەنى، الماتى سوناۋ كەڭەس زامانىنىڭ وزىندە ەڭ ءبىر كوگالداندىرىلعان قالالاردىڭ ءبىرى اتانىپ كەلدى. ءبىز وسى ءداستۇردى قازىر دە جالعاستىرۋىمىز كەرەك. بۇگىن كۇن بۇلتتانىپ، جاڭبىر سىركىرەپ تۇرسا دا جاستار كوپتەپ كەلدى. ماعان انشىلەر مەن كينو جانە تەاتر سالاسىنداعى ارىپتەستەرىم قولداۋ كورسەتتى»، - دەدى ا. تولەپوۆ.
ۇيىمداستىرۋشىلاردىڭ ايتۋىنشا، بۇل شارا قالا تۇرعىندارىن تابيعاتتى ايالاي بىلۋگە، قالانىڭ ەكولوگيالىق احۋالىنا بەي- جاي قاراماۋعا شاقىرادى.
«الماتىنىڭ مەرەيتويى جانە «مەدەۋ» ساياباعىن دامىتۋدىڭ كەشەندى جوسپارىنا سايكەس، ءبىز قازىر اپتا سايىن سەنبىلىك وتكىزىپ جاتىرمىز. ءبىراق، بۇگىنگى كۇن ەرەكشە - ويتكەنى، بۇگىن ءبىز 1000 ءتۇپ قىلقان جاپىراقتى جانە جاپىراقتى اعاشتاردىڭ كوشەتتەرىن وتىرعىزدىق. ەندى ساياباقتا اعاش وتىرعىزۋ جۇمىستارى الداعى ماۋسىم ايىنىڭ باسىنا دەيىن جالعاسادى»، - دەدى «مەدەۋ» مەملەكەتتىك وڭىرلىك تابيعي ساياباعىنىڭ ديرەكتورى سامعات ەرمەكبايەۆ.
اۆتور: ايبوتا جاپپاربەرگەن
