100 رەت پە؟ 100 ادامنان با؟ - موبيلدىك اۋدارىمنىڭ ءتارتىبى ءتۇسىندىرىلدى

استانا. KAZINFORM - مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باس ساراپشىسى ەرسايىن كوپتىلەۋ ۇلى موبيلدىك اۋدارىمدارعا قويىلاتىن شەكتەۋ ماسەلەسىن ءتۇسىندىردى.

— موبيلدىك اۋدارىم - بۇل جەكە تۇلعانىڭ ءوزىنىڭ قاجەتتىلىگىنە ارنالعان، كاسىپكەرلىك قىزمەتكە ارنالماعان، سالىق سالۋعا جاتپايتىن اۋدارىم ءتۇرى.

كاسىپكەرلەر سالىق تولەۋدەن جالتارۋ ماقساتىندا موبيلدىك اۋدارىمداردى كوپ پايدالانىپ كەتتى. وسى تۇلعالاردى انىقتاپ، ءوز كىرىستەرىنە سالىق تولەۋدى مىندەتتەۋ ءۇشىن جانە جەكە كاسىپكەر رەتىندە تىركەلمەگەن تۇلعالاردى تىركەتۋ ماقساتىندا موبيلدىك اۋدارىمداردى باقىلاۋ جۇزەگە اسىرىلىپ جاتىر. بۇنىڭ نەگىزگى ولشەمشارتى — اي سايىن 100 نەمەسە ودان دا كوپ تۇلعالاردان 3 اي قاتارىنان موبيلدىك اۋدارىم الۋ. وسىنداي جاعداي انىقتالعاندا عانا مەملەكەتتىك كىرىستەر كوميتەتى كامەرالدىق باقىلاۋعا الادى. بۇل جەردە اتاپ وتەتىن جايت، اۋدارىم 100 رەت ەمەس، 100 تۇلعادان، ياعني 100 ءتۇرلى ادامنان كۇنتىزبەلىك 3 اي قاتارىنان تۇسكەن جاعدايدا عانا ەرەجە بۇزىلعان بولىپ سانالادى، - دەدى ول.

سونداي-اق باس ساراپشى قارجى مينيسترلىگى قولدانىستاعى ەرەجەنى تولىقتىرۋ ءۇشىن ۇلتتىق بانككە جاڭا ۇسىنىس بەرگەنىن اتاپ ءوتتى.

— وسى 100 اۋدارىم ولشەمشارتىن ساقتاي وتىرىپ، وسى اۋدارىمدار كەزىندە تۇسكەن قارجىنىڭ جالپى سوماسى 255 مىڭ تەڭگەدەن اسسا عانا ەرەجەنى بۇزدى دەپ قارايتىن ۇسىنىس ەنگىزىلدى. بۇنىڭ نەگىزگى ماقساتى — وتە تومەن سومالاردى (ماسەلەن 100 تەڭگەدەن جاسالعان اۋدارىمدار) باقىلاۋدان الۋ. سەبەبى بىزدە كاسىپكەرلىك تۋرالى كودەكسكە ساي، ەڭ تومەنگى ايلىقتىڭ (85 مىڭ تەڭگە) 12 ەسەلەنگەن مولشەرىنەن اساتىن تابىس تاپقان جەكە تۇلعانى عانا سالىق ورگانى دارا كاسىپكەر رەتىندە تانىپ، ەسەپكە قويا الادى. ياعني ءار ايدا 85 مىڭنان، 3 ايدا 255 مىڭنان تومەن تابىس تاپقان ادام دارا كاسىپ يەسى بولىپ سانالمايدى، - دەيدى ەرسايىن كوپتىلەۋ ۇلى.

مامان قازىرگى تاڭدا بۇل نورما كۇشىندە ەمەس ەكەنىن، ءالى ۇلتتىق بانكپەن كەلىسۋ ساتىسىندا ەكەنىن قايىرا ەسكە سالدى.

ايتا كەتەيىك، كەشە جەكە كاسىپ يەسى موبيلدىك اۋدارىمعا قاتىستى قانداي ەرەجەنى ەسكەرۋ كەرەگىن جازعان ەدىك.