ماڭعىستاۋدا جەردەن 100-200 مەتر تومەندەگەن جىعىلعان دەگەن ورىن بار

الماتى. قازاقپارات - بۇگىن الماتىدا تۋريستەرگە ارنالعان «ءۇستىرت قۇپياسى» جول نۇسقاعىشتىڭ تۇساۋى كەسىلدى، دەپ حابارلايدى قازاقپارات ءتىلشىسى.

اقپاراتتىق بۋكلەت ماڭعىستاۋ تۇبەگىنە جاسالعان ءىرى ەكسپەديسيانىڭ جۇمىسىنىڭ ناتيجەسىندە جاسالدى.

247 ادام 69 جول تولعامايتىن كولىكپەن 1200 استام شاقىرىم جەردى ءجۇرىپ ءوتىپ، قۇپياعا تولى ماڭعىستاۋ تۇبەگىن ارالاپ شىققان.

 «ماڭعىستاۋ تۇبەگى قۇپياعا تولى جەر. مۇندا 11 مىڭنان استام تاريحي تابيعي كەرەمەت ەسكەرتكىشتەر بار. ولاردىڭ كەيبىرىن جەرگىلىكتى تۇرعىندار كورمەگەن. ولاردىڭ ءبىرى جىعىلعان دەگەن جەر. ول جەردەن 100-200 مەتردەي تومەندەپ كەتكەن. وسى جەرلەردىڭ بارىنە تۋريستەرگە جول سالدىق»، - دەدى Nomad Explorer كومانداسىنىڭ جەتەكشىسى مارعۇلان سەيسەنبايەۆ.

ونىڭ ايتۋىنشا، 34 ادام قاۋىپسىزدىك، اكىمشىلىك بويىنشا كومەكشى بولسا، قالعان 220 ادام تۋريست رەتىندە قاتىستى.

وسى ساپاردىڭ ناتيجەسىندە ء«ۇستىرت قۇپياسى» جول نۇسقاعىشى تانىستىرىلدى.

بۇل كىتاپ اكادەميك شاحماردان ەسەنوۆ اتىنداعى عىلىمي- ءبىلىم بەرۋ قورىنىڭ قولداۋىمەن باسىلدى. جول نۇسقاعىش 1200 تارالىممەن ناۋرىز ايىندا الماتى مەن اقتاۋدا ساتىلىمعا شىعادى.

«وتكەن كوكتەمدە ماڭعىستاۋ تۇبەگىنە جاسالعان ەكسپەديتسيا بويىنشا جول نۇسقاعىشتى جاساۋ تۋرالى ۇسىنىس ءتۇستى. شاحماردان ەسەنوۆ سول ماڭعىستاۋ تۇبەگىندە پايدالى كەن قازبالارىن اشقان بولاتىن. سوندىقتان، بۇل ۇسىنىستى قابىل الدىق. بۇل اقپاراتتىق كىتاپشا قازاقستاندىقتاردى قاسيەتتى جەرلەرگە ءجيى ساياحاتتاۋعا سەپتىگىن تيگىزەدى دەپ ۇمىتتەنەمىز»، - دەدى اتالعان قوردىڭ وكىلى ايعانىم ماليشيەۆا.

اقپاراتتىق كىتاپشادا تۋريستەردىڭ توقتايتىن كوورديناتتارى، اۆتوتۇراق ورىندارى، جاقىن ماڭداعى نىساندار تۋرالى مالىمەتتەر بار.

 ايتا كەتۋ كەرەك، Nomad Explorer بيىل التاي تاۋىنا ەكسپەديتسياعا شىقپاق. سونىمەن قاتار، بيىل ديسكاۆەري جوباسى اياسىندا موڭعوليا جەرىنە ساياحات بەلگىلەنگەن.

اۆتور: گۇلميرا عوسمانالي