ەلوردادا «وليمپيادا ويىندارىنا دەيىن 100 كۇن» اكسياسى اياسىندا اسپانعا 100 شار ۇشىرىلدى - فوتو
بۇل تۋرالى ق ر ۇلتتىق وليمپيادالىق كوميتەتى حابارلادى.
جازعى وليمپيادا ويىندارىنا ءۇش ايدان استام ۋاقىت قالدى. وسى كۇندەرى بۇكىل الەمدە بايراقتى جارىسقا 100 كۇن قالعانىن اتاپ وتۋدە.
شارانىڭ باستى ماقساتى - وليمپيادالىق قوزعالىستى ناسيحاتتاپ، ريو-دە-جانەيروداعى وليمپيادا ويىندارىنا اتتاناتىن سپورتشىلارعا قولداۋ ءبىلدىرۋ.
استانا قالاسىنداعى «حان شاتىر» و س و ماڭىنداعى الاڭ سپورت ورتالىعىنا اينالدى. ارنايى سپورتتىق ايماقتار جاسالىپ، سول جەردە بوكس، كۇرەس، ۆەلوسپورت، تاەكۆوندو، دزيۋدو، اۋىر اتلەتيكا، ترياتلون، تەننيس سياقتى وليمپيادالىق سپورت تۇرلەرىنەن ۇلتتىق فەدەراتسيالار ارنايى شەبەرلىك ساباقتارىن، ءتۇرلى بايقاۋلار وتكىزىپ، سپورتشىلاردىڭ قولتاڭبالارىن تاراتتى.
بۇل كۇنى الاڭعا ات باسىن بۇرعان كەز كەلگەن ادام ءوزىن ناعىز سپورتشى سياقتى سەزىنۋگە مۇمكىندىك الدى. وليمپيادالىق سپورت تۇرلەرىنەن باسقا street workout (ستريت ۋوركاۋت) جانە پاركۋر دا ءوز ونەرلەرىن كورسەتتى.
شاراعا ق ر مادەنيەت جانە سپورت ءمينيسترى ارىستانبەك مۇحامەدي ۇلى، استانا قالاسىنىڭ اكىمى ادىلبەك جاقسىبەكوۆ، ق ر ۇلتتىق وليمپيادالىق كوميتەتى باس حاتشىسى دانيار ابۋلگازين، اتاقتى سپورتشىلار يۋري مەلنيچەنكو، گيۋزەل مانيۋروۆا، دانيار ەلەۋسىنوۆ، اسحات جىتكەيەۆ، ارمان چىلمانوۆ، داريعا شاكىموۆا، ءلاززات كۇنگەيبايەۆا، يۋري شۋكين، ءسابينا اشىربەكوۆا قاتىستى.
«وليمپياداعا 100 كۇن» شاراسى اياسىندا كوككە 100 شار ۇشىرىلدى.
كۇنسۇلتان وتارباي
