تەگىن 10 سوتىق جەر تۋرالى نە ءبىلۋ كەرەك؟ ماڭىزدى 9 سۇراقتىڭ جاۋابى
ەندى كەز كەلگەن قازاقستاندىق 10 سوتىق جەردى الۋعا ءوتىنىم بەرە الادى.
بۇل جاڭا مەملەكەتتىك باعدارلاما ما؟
بۇل ۇكىمەت ۇسىنعان جاڭا باعدارلاما ەمەس. جەر ۋچاسكەسىن الۋ قۇقىعى «جەر قاتىناستارى تۋرالى» زاڭنىڭ 50-بابىندا كورسەتىلگەن.
جەردى كىم تەگىن الا الادى؟
18 جاستان اسقان كەز كەلگەن قازاقستاندىق جەكەمەنشىك تۇرعىن ءۇي قۇرىلىسى ءۇشىن 10 سوتىق جەر تەلىمىن تەگىن الا الادى. بۇل رەتتە سىزدە جىلجىمايتىن مۇلىك - پاتەر، ءۇي، گاراج، جەر ۋچاسكەسى بار-جوعى ماڭىزدى ەمەس. دەگەنمەن، تۇرعىن ءۇيدى پايدالانۋعا بەرۋ اكتىسىنە قول قويعاننان كەيىن عانا جەر يەسى اتانادى.
جەر الۋ ءۇشىن تۇرعىلىقتى جەر بويىنشا تىركەلۋ قاجەت پە؟
جەردى قازاقستاننىڭ كەز كەلگەن وڭىرىنەن الۋعا بولادى. ول ءۇشىن تۇرعىلىقتى جەردىڭ جانە تۇرعىلىقتى جەر بويىنشا تىركەۋدىڭ قاجەتتىلىگى جوق.
جەر الۋعا قالاي كەزەككە تۇرۋعا بولادى؟
قازاقستاندىقتار كەزەككە ونلاين تۇرا الادى. ول ءۇشىن كومپيۋتەر جانە ە س ق-كىلت قاجەت. ارى قاراي ەلەكترون ۇكىمەت پورتالىنا ءوتۋ كەرەك، وسى قىزمەت اتاۋىن ىزدەۋ جۇيەسىنە ەنگىزۋگە بولادى نەمەسە «جىلجىمايتىن مۇلىك» - «جەر قاتىناستارى» بولىمىندە «جەكەمەنشىك تۇرعىن ءۇي سالۋعا نەمەسە جەر تەلىمىن الۋعا جەر تەلىمىن قاراۋ نەمەسە الۋ ءۇشىن كەزەككە قويۋ» قىزمەتىن تاڭداۋعا بولادى.
الماتىدان نەمەسە نۇر-سۇلتاننان جەر الۋعا بولا ما؟
مەگاپوليستەردە بۇرىننان بوس جەرلەر جوق. مىسالى، استانادا 2007 -جىلدان باستاپ كەزەككە قويۋ جۇرگىزىلمەيدى. ال الماتىدا 2006 -جىلدان باستاپ جەر الۋ مۇمكىن ەمەس.
2022 -جىلعى ساۋىردەگى جاعداي بويىنشا شىمكەنتتە دە بوس ۋچاسكەلەر جوق.
الماتى ماڭىنان جەر بەرە مە؟
الماتىعا ىرگەلەس ىلە، قاراساي، تالعار اۋداندارىنان جەر الۋعا بولادى. وبلىستىڭ جەر قاتىناستارى باسقارماسىنىڭ مالىمەتىنشە، 2021 -جىلى ءوڭىر بويىنشا 616 جەر ۋچاسكەسى بەرىلگەن. دەسە دە، كەزەكتە تۇرعانداردىڭ سانى 70 مىڭعا جاقىنداپ قالعانىن ەسكەرۋ قاجەت.
جەردى ماڭگىگە بەرە مە؟
باستاپقىدا ءۇي سالىنىپ، پايدالانۋعا بەرىلگەنگە دەيىن ۋچاسكە ۋاقىتشا وتەۋلى جەر پايدالانۋ (جالعا الۋ) قۇقىعىمەن بەرىلەدى. شارتتا يگەرۋ مەرزىمى كورسەتىلەدى. ونى جەرگىلىكتى اكىمدىك انىقتايدى. تۇرعىن ءۇيدى پايدالانۋعا بەرۋ تۋرالى اكتىگە قول قويىلعاننان كەيىن عانا مەنشىك يەسى بولا الاسىز.
جەردى الىپ، ونى بىردەن ساتۋعا بولا ما؟
ۋاقىتشا وتەۋلى جەر پايدالانۋ قۇقىعى جىلجىمايتىن مۇلىكتى ساتۋعا وكىلەتتىك بەرمەيدى. نىساندى ساتۋ ءۇشىن، ەڭ الدىمەن، ونى مەنشىككە بەرۋ كەرەك. مۇنى تەك ءۇي سالۋ ارقىلى جاساۋعا بولادى.
جەردى الىپ، ەشقانداي قۇرىلىس جۇرگىزبەۋگە بولا ما؟
زاڭ بويىنشا، ەگەر جەر ۋچاسكەسى شارتتا كورسەتىلگەن مەرزىم ىشىندە ءوز ماقساتى بويىنشا پايدالانىلماسا، جەر قايتادان مەملەكەتكە قايتارىلادى، ال جەر الۋشىعا ايىپپۇل سالىنۋى مۇمكىن.
دەرەككوز: Tengrinews.kz
