تارازدىق شەنەۋنىكتەر 10 باتارەيكانى 9 ميلليون تەڭگەگە ساتىپ الماق بولعان
مۇنداي باعا وبلىستىق سيفرلىق تەحنولوگيالار باسقارماسىنىڭ مەملەكەتتىك ساتىپ الۋ سايتىندا كورسەتىلگەن. ەگەر جوسپار جۇزەگە اسقاندا ەڭ ارزانى 70 تەڭگە تۇراتىن باتارەيكانىڭ ءاربىر داناسىنا قازىنادان 901 مىڭ 700 تەڭگە جۇمسالار ەدى.
الايدا شەنەۋنىكتەردىڭ ارەكەتىنە سىبايلاس جەمقورلىققا قارسى ءىس-قيمىل دەپارتامەنتى قىزمەتكەرلەرى مەن كاسىپكەرلەر پالاتاسىنىڭ وكىلدەرى توسقاۋىل قويعان. ولار ۇسىنىس حات جازىپ، تاۋار قۇنىن 299 تەڭگەگە دەيىن تومەندەتكەن. ناتيجەسىندە 9 ميلليون تەڭگە ۇنەمدەلدى. سالا ماماندارىنىڭ سوزىنشە، بۇل وقيعا تاپسىرىس بەرۋ كەزىندەگى قاتەلىكتەن بولعان. دەگەنمەن، تاۋار قۇنىن نارىقتاعىدان شارىقتاتىپ كورسەتۋ وزگە سالالاردا دا بايقالعان.
«سول سياقتى جاعداي تاراز قالاسى ءبىلىم بولىمىنە قاتىستى ماسەلە بولعان. ول جەردە كومپيۋتەرلەردى 380 مىڭعا الامىز دەپ جوسپارلانعان بولسا ونىڭ نارىقتاعى باعاسى 280-300 مىڭ تەڭگە تۇراتىنى بەلگىلى بولدى. سوعان دا بايلانىستى ۇسىنىس حات جولداعان بولاتىنبىز. سونىڭ ناتيجەسىندە 16 ميلليونعا جۋىق ۇنەمدەۋ جاعدايلارى بولىپ جاتىر»، - دەيدى وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ باسقارما باسشىسى داۋرەن وماروۆ.
