شىعىس قازاقستان ديقاندارى بيىل ەگىس القابىن 10,7 مىڭ گەكتارعا ارتتىرماق
ش ق و اۋىل شارۋاشىلىعى باسقارماسىنىڭ مالىمەتىنە سۇيەنسەك، بيىل اگروونەركاسىپتىك كەشەن سالاسىنا 24,5 ميلليارد تەڭگە بولىنگەن. ديقاندارعا «اگرارلىق نەسيە كورپوراتسياسى» ا ق ارقىلى 8 ميلليارد تەڭگە نەسيە بەرىلمەك.
«بيىل ءسۇتتى مال شارۋاشىلىعىندا، ءسۇت- تاۋار فەرمالارىن سالۋ جانە رەكونسترۋكتسيالاۋ بويىنشا 6 جوبانى ىسكە اسىرۋ جوسپارلانعان. سونىڭ ناتيجەسىندە، ءسۇت- تاۋار فەرمالارىنىڭ ءسۇت ءوندىرۋ كولەمى جىلىنا 47,5 مىڭ تونناعا ۇلعايادى. بۇل كەلەسى جىلى جەرگىلىكتى ءسۇت وڭدەۋ كاسىپورىندارىنىڭ جۇكتەمەسىن%65 عا دەيىن جەتكىزۋگە مۇمكىندىك بەرەدى»، - دەيدى باسقارما باسشىسىنىڭ مىندەتىن اتقارۋشى راميل ساعاندىقوۆ.
وسى جىلدان باستاپ وبلىستا «اۋىل اماناتى» حالىقتىڭ تابىسىن ارتتىرۋ باعدارلاماسى قولعا الىنباق. سونىڭ شەڭبەرىندە اۋىل حالقىنا 1,5 ميلليارد تەڭگەگە نەسيە بەرۋ كوزدەلگەن.
باعدارلامانىڭ نەگىزگى ماقساتى - اۋىل شارۋاشىلىعى تاۋارىن وندىرۋشىلەردى جان- جاقتى قولداۋ، اۋىل تۇرعىندارىن اگرارلىق بيزنەسكە بارىنشا تارتۋ، ازىق- تۇلىك قاۋىپسىزدىگىنە جانە ازاماتتاردىڭ ءومىر ءسۇرۋ ساپاسىن جاقسارتۋعا بايلانىستى ماسەلەلەردى شەشۋ.
«بولجامعا سايكەس، 2023 -جىلى ءوڭىر بويىنشا اۋىل شارۋاشىلىعى داقىلدارىنىڭ ەگىس القابى 653,1 مىڭ گەكتاردى قۇرايدى. بۇل وتكەن جىلعى دەڭگەيدەن 10,7 مىڭ گەكتارعا ارتىق»، - دەيدى ر. ساعاندىقوۆ.
ەسكە سالساق، وسىعان دەيىن شىعىس قازاقستان ديقاندارىنىڭ سۋ تاپشىلىعى زاردابىن تارتىپ وتىرعانى حابارلانعان.
