كۇن سايىن 10 جاستاعى قىزداردىڭ 47 مىڭنان استامى كۇيەۋگە تيۋگە ءماجبۇر
بۇل تۋرالى ب ۇ ۇ حالىقتى قونىستاندىرۋ قورى باعدارلاماسىنىڭ (يۋنفپا) اتقارۋشى وكىلى رايىمبەك سيسەمالييەۆ ءمالىم ەتتى، دەپ حابارلايدى قازاقپارات.
استانادا ب ۇ ۇ حالىقتى قونىستاندىرۋ قورى باعدارلاماسىنىڭ «10: وسى جاستاعى قىزداردان ءبىزدىڭ بولاشاعىمىز قانشالىقتى تاۋەلدى» دەگەن تاقىرىپپەن بايانداماسى تانىستىرىلدى.
«كۇن سايىن 47700 قىز، ونىڭ كوبى 10 جاستا، كۇشتەپ كۇيەۋگە بەرىلەدى. بالالىق نەكە جۇكتىلىككە اكەلەدى. بالانىڭ جۇكتىلىگى ءارقاشان قاۋىپتى، ونىڭ ۇستىنە قىزدار وقۋدى تاستاپ كەتۋگە ءماجبۇر بولادى. بۇل ءوز كەزەگىندە ونىڭ بولاشاعىنا بالتا شابادى. جىنىستىق تۇرعىدا تولىسقان ميلليونداعان قىز ءومىرباقي كەدەيلىكتەن كوز اشپايدى، قۇقىقتارى اياققا تاپتالىپ، مۇمكىندىكتەردى پايدالانا الماي، قور بولادى» ، - دەيدى سيسەماليەۆ.
ونىڭ ايتۋىنشا، ءبىلىم العان بويجەتكەندەردىڭ ەگەر قۇقىقتارى تاپتالماسا، تابىسى ءۇش ەسەگە دەيىن كوپ بولادى. ولاردىڭ دەنساۋلىقتارى ەداۋىر جاقسى كەلەدى. تابىستىڭ، ەڭبەك تيىمدىلىگىنىڭ جوعارى بولۋى - مەملەكەتتىڭ دامۋىنا قاتتى اسەر ەتەدى. ءبىزدىڭ بولاشاعىمىز 10 جاستاعى 60 ميلليون قىزدىڭ تاعدىرىنا قاتتى تاۋەلدى ەكەندىگىن اتالمىش بايانداما كورسەتىپ وتىر.
