قازاقستاندا تۇرعىندار سانى 10 عا جەتپەيتىن 45 اۋىل بار
ورتالىق كوممۋنيكاتسيالار قىزمەتىندە وتكەن بريفينگىدە ق ر يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى بەيبىت شاحانوۆ وسىنداي مالىمەت بەردى، دەپ حابارلايدى قازاقپارات ءتىلشىسى.
«ەل بويىنشا بارلىعى 6316 اۋىل بار. ونىڭ ىشىندە حالىق سانى 50 ادامنان كەم - 348 اۋىل (10,1 مىڭ ادام) جانە 10 ادامنان كەم - 45 اۋىل (253 ادام) بار. ونىڭ ىشىندە 3991 اۋىل ورتالىق سۋمەن قامتىلعان، 403 اۋىلدا كەشەندى بلوك- مودۋلدەر ورناتىلعان. اۋىزسۋمەن قامتىلماعان 1922 اۋىلدىڭ 793 ىندە ورتالىقتاندىرىلعان سۋمەن جابدىقتاۋ جۇيەلەرىن سالۋ جۇمىستارىن جالعاستىرۋ جوسپارلانىپ وتىر»، - دەدى كوميتەت باسشىسىنىڭ ورىنباسارى.
ونىڭ مالىمەتى بويىنشا، تۇرعىن سانى 200-گە جەتپەيتىن اۋىلدارعا كەشەندى بلوك- مودۋلدەر ورناتىلماق.
«قاراجاتتى ءتيىمدى پايدالانۋ ءۇشىن حالىق سانى 200 دەن كەم 1129 ۇساق اۋىلدا كەشەندى بلوك- مودۋلدەر ورناتىلادى. كەشەندى بلوك- مودۋلدەردىڭ باعاسى، ورناتۋ جانە پايدالانۋ جولدارى جەڭىل. قاجەت بولعان جاعدايدا اۋىلدان اۋىلعا تاسىمالداۋ مۇمكىندىگى بار. بيىل جەرگىلىكتى اتقارۋشى ورگانداردىڭ جەدەل اقپاراتىنا سايكەس 368 اۋىلدى قامتۋ جوسپارلانۋدا. ونىڭ ىشىندە 148 اۋىلدا ورتالىق سۋمەن جابدىقتاۋ جانە 220 اۋىلدا جەرگىلىكتى بيۋدجەت قاراجاتى ەسەبىنەن كەشەندى بلوك- مودۋلدەر ورناتۋ جوسپارلانۋدا»، - دەدى بەيبىت شاحانوۆ.
اۆتور: ەسىمجان ناقتىباي
