قىتايدىڭ 10 ءىرى كومپانياسى الماتى وبلىسىمەن 2 ميلليارد دوللاردان استام سوماعا مەموراندۋمدارعا قول قويدى - فوتو

تالدىقورعان. قازاقپارات - وبلىستىڭ ينۆەستيتسيالىق مۇمكىندىكتەرىن تانىستىرۋعا، جاڭا سەرىكتەستەر تاۋىپ، ءوزارا ءتيىمدى ىنتىماقتاستىق كەلىسىمشارتتارىن جاساسۋ ماقساتىندا الماتى وبلىسىنىڭ اكىمى اماندىق باتالوۆ باستاعان رەسمي دەلەگاتسيا ەكى كۇندىك ساپارمەن قىتاي حالىق رەسپۋبليكاسىنىڭ شينجاڭ ۇيعىر اۆتونوميالىق ولكەسىندە بولىپ قايتتى.

ساپار بارىسىندا ق ح ر ش ۇ ا ءو- دەگى ءبىرقاتار ىرگەلى كاسىپورىنداردىڭ تىنىس- تىرشىلىگىمەن تانىسىپ، ۇلكەن بيزنەس- فورۋم وتكىزىلدى.

العاشقى كۇنى دەلەگاتسيا قۋاتتىلىعى جىلىنا 300 مىڭ توننا قانت وڭدەيتىن ءىرى مەملەكەتتىك كورپوراتسيا زاۋىتىندا بولدى. مۇنان كەيىن كوپ جىلعى تاريحى بار جيھاز وندىرەتىن كاسىپورىننىڭ جۇمىسىمەن تانىستى. بۇگىنگى كۇنى الەمگە تانىمال «سيمەنس» كومپانياسىنىڭ باستى باسەكەلەسى ەنەرگيا قۇرالدارىن شىعاراتىن «تي بي ەي» كورپوراتسياسىنا دا اتباسىن بۇردى. كەزدەسۋ قورىتىندىسىندا ءوزارا ىنتىماقتاستىق تۋرالى كەلىسىمشارت جاسالىپ، جاڭارتىلعان ەنەرگيا كوزدەرىنە قاتىستى ينۆەستيتسيالىق جوبالاردى قولعا الۋ تۋرالى مەموراندۋمعا قول قويىلدى.

تاعى ءبىر نازار اۋدارىلعان نىسان - مەتاللۋرگيالىق زاۋىت، مۇنداعى كاسىپورىننىڭ ءوز جۇمىسشىلارىنا دەمالىس جانە تۇرمىستىق جاعدايلار جاساۋداعى تاجىريبەسى ۇيرەنۋگە تۇرارلىق.

ءوز كەزەگىندە وبلىس اكىمى ا. باتالوۆ قىتايلىق ارىپتەستەرىنە وبلىستىڭ مۇمكىندىكتەرى تۋرالى بايانداپ، «قورعاس» شەكارا ماڭى ورتالىعىندا جانە يندۋستريالدى ايماقتاردا سەرىكتەستىكتى دامىتۋعا قولايلى جاعداي جاسالعانىن ايتتى.

ساپاردىڭ ەكىنشى كۇنىندە اۋقىمدى بيزنەس- فورۋم ءوتىپ، وندا جەتىسۋ ولكەسىنىڭ ينۆەستيتسيالىق مۇمكىندىكتەرى كەڭىنەن تانىستىرىلدى. وبلىس باسشىسى ا. باتالوۆ كاسىپكەرلەرگە ەشقانداي تورەشىلدىك كەدەرگىسىز بارلىق جاعداي جاسالاتىنىن جەتكىزدى.

ش ۇ ا ءو ءتوراعاسىنىڭ ورىنباسارى ماو سايديحامۋزا الماتى وبلىسىنىڭ ينۆەستيتسيالىق مۇمكىندىكتەرىنىڭ تانىستىرىلىمى ەكى ايماقتىڭ ىنتىماقتاستىعىن كەڭەيتۋ مەن دامىتۋداعى كەرەمەت پلاتفورما ەكەنىن اتاپ ءوتتى.

سونىمەن قاتار ول بۇل تەك ەكونوميكادا عانا ەمەس، ءبىلىم، عىلىم، تۋريزم سالالارىندا دا جاڭا بايلانىستارعا جول اشاتىنىن تىلگە تيەك ەتتى.

جالپى، ساپار بارىسىندا 10 نان استام ءىرى كومپانيالار الماتى وبلىسىمەن جالپى سوماسى 2 ميلليارد دوللاردان استام ينۆەستيتسيا بولاتىن 12 مەموراندۋمعا قول قويدى. ولاردىڭ قاتارىندا كۇن جانە جەل ەلەكتر ستانسالارىنىڭ، قابىرعا پانەلدەرىن شىعاراتىن يننوۆاتسيالىق زاۋىتتىڭ، قازاقستاندىق- قىتايلىق اگروكەشەننىڭ، اۋىل شارۋاشىلىعى اگرووڭدەۋ پاركىنىڭ قۇرىلىسى جانە تاعى باسقا جوبالار بار. سونداي- اق تاجىريبە الماسىپ، مادەني، ىسكەري بايلانىستار دامىتىلىپ، بۇدان ءارى دە ىنتىماقتاستىقتا بولۋ ماسەلەسى پىسىقتالدى.