دارىگەرلەردىڭ جالاقىسى 10-15 پايىزعا كوتەرىلەدى

استانا. قازاقپارات - ق ر دەنساۋلىق ساقتاۋ ءمينيسترى ەلجان ءبىرتانوۆتىڭ مالىمەتىنە سايكەس، بۇگىندە دارىگەردىڭ ورتاشا جالاقىسى 120-130 مىڭ تەڭگەنى قۇرايدى.
None
None

مينيسترلىك ەمحانالاردىڭ جالاقى ساياساتىنا ارالاسا المايدى. ونى پاتسيەنتتەردىڭ سانى، قىزمەت ساپاسى جانە تاعى باسقا نارىقتىق فاكتورلار انىقتايدى. سوعان قاراي باس دارىگەرلەر ءاربىر ماماننىڭ جالاقىسىن تاعايىندايدى، دەپ حابارلايدى قازاقپارات ءتىلشىسى.

«قازىرگى كەزدە دەنساۋلىق ساقتاۋ سالاسىنا شامامەن 1 تريلليون تەڭگە بولىنەدى. سونىڭ 40 پايىزى جالاقىعا جۇمسالسا، تۋرا سونداي اقشا مەديتسينالىق پرەپاراتتاردى ساتىپ الۋعا كەتەدى. ال قالعان 20 پايىزى - دارىگەرلەردى وقىتۋعا كەتەتىن اقشا جانە اكىمشىلىك شىعىندار. مىنە، سول اكىمشىلىك شىعىنداردى ازايتۋدىڭ ەسەبىنەن جالاقىنى كوتەرۋگە مۇمكىندىك بار. مىسالى، بىزدە ءبىر اۋرۋحانانىڭ ورنىنا ءتورت اۋرۋحانانى سالىپ تاستاعان. ءتورت باس دارىگەر، سەگىز ورىنباسارى، ەسەپشىلەر قانشاما. ال اۋرۋحانالاردى بىرىكتىرىپ، كوپبەيىندى كەشەندەردى قۇرۋ ارقىلى اكىمشىلىك شىعىنداردى قىسقارتۋعا بولادى. ءيا، باس دارىگەرلەر ازايادى. دەگەنمەن، حالىققا ىڭعايلى بولادى. دارىگەرلەردىڭ جالاقىسى دا كوتەرىلەدى»، - دەدى ءبىرتانوۆ بۇگىن ق ر پرەزيدەنتى جانىنداعى ادام قۇقىقتارى جونىندەگى كوميسسيانىڭ كەڭەيتىلگەن وتىرىسىندا.

ءمينيستردىڭ ايتۋىنشا، اكىمشلىك پەرسونالدى بىرىكتىرۋدىڭ ارقاسىندا جىلىنا شامامەن 10 ميلليارد تەڭگەنى ۇنەمدەپ وتىرۋعا بولادى. سونىڭ ەسەبىنەن دارىگەرلەردىڭ جالاقىسىن 10-15 پايىزعا كوتەرۋگە مۇمكىندىك بار.

«ارينە، بۇنىڭ بارلىعىن بىردەن ىسكە اسىرۋ مۇمكىن ەمەس. سوندىقتان ءبىز ارنايى جوسپاردى جاساپ، 2025-جىلعا دەيىن وسى سالاداعى جۇمىستى بىتىندەپ اتقاراتىن بولامىز. بۇدان بىلاي جەرگىلىكتى بيلىك تە بولەك-بولەك ەمەس، ءبىر جەردە شوعىرلانعان كوپبەيىندى اۋرۋحانالاردى سالۋعا دەن قويۋى قاجەت»، - دەپ اتاپ كورسەتتى ەلجان امانتاي ۇلى.

ونىڭ سوزىنە قاراعاندا، جالاقىنى ارتتىرۋدىڭ تاعى ءبىر جولى - مەديتسينالىق قىزمەتتىڭ باعاسىن كوتەرۋ. ال قىزمەتتىڭ قۇنىن كوتەرۋ ءۇشىن دەنساۋلىق ساقتاۋ سالاسىنا بولىنەتىن قارجىنىڭ كولەمىن ۇلعايتۋ قاجەت. بيۋدجەت تاراپىنان ونداي اقشانىڭ بولمايتىنىن ەسكەرسە، مىندەتتى الەۋمەتتىك مەديتسينالىق ساقتاندىرۋ قورىنىڭ قارجىسىنا ول ماقساتتى ورىنداۋعا ابدەن بولادى.

ايتا كەتەيىك، الداعى ۋاقىتتا جەدەل مەديتسينالىق جاردەم قىزمەتى وزگەرتۋ اياسىندا ەمحانالاردا ىستەيتىن كەيبىر دارىگەرلەردىڭ جالاقىسىن كوتەرۋ جوسپارلانىپ وتىر.

سوڭعى جاڭالىقتار