بولاشاقتا 10-15 مىڭ مەتر تەرەڭدىكتەن مۇناي وندىرىلەتىن بولادى
ويتكەنى كۇنى بۇگىنگە دەيىن يگەرىلىپ كەلە جاتقان كەنىشتەر ارى كەتسە 5 مىڭ مەترلىك تەرەڭدىكتەن الىنادى. ال بولاشاقتا 7 مىڭ مەتردەن تومەن تەرەڭدىكتەگى شيكىزات كوزدەرىن زەرتتەيتىن يننوۆاتسيالىق تەحنولوگيالار قاجەت.
مۇنايلى ولكەدە باس قوسقان عالىمدار مەن گەولوگتار، كومىر سۋتەگى شيكىزاتىن ءوندىرۋشى ءىرى كومپانيا وكىلدەرى ءوندىرىس بولاشاعىن تالقىعا سالدى. الداعى 15-20 جىلدا تاياز جەرلەردەگى مۇناي كوزدەرى تۇگەسىلەدى. سوندىقتان عالىمدار جاڭا مۇمكىندىكتەر جولىن قاراستىرۋدا.
«گەولوگيالىق زەرتتەۋ جۇرگىزۋشى مەكەمەلەر جاڭا تەحنولوگيالاردىڭ جوباسىن جاساپ، ونى قولدانىسقا ەنگىزۋ ماسەلەسىن جەدەلدەتۋ قاجەت»، - دەيدى عالىمدار.
بالتابەك قۋاندىقوۆ، قازاقستان مۇنايشى- گەولوگتار قاۋىمداستىعىنىڭ ءتوراعاسى:
- تاياز جەردە ورنالاسقان ءتىپتى تەڭىز، قاراشىعاناق، قاشاعانداعى 4 مىڭ مەترلىك تەرەڭدىكتەگى مۇناي كوزدەرىن اشىپ بولدىق. ەندى ءبىزدىڭ بولاشاعىمىز ودان تەرەڭدە جاتقان قۇرىلىمداردى ىزدەۋىمىز كەرەك. سوندا مۇنايدىڭ مول كوزى بار ەكەندىگىن كوپتەگەن عالىم ايتىپ بولجاعان.
مامانداردىڭ ايتۋىنشا، بارلاۋ- ءوندىرۋ مەكەمەلەرى وسى كۇنگە دەيىن جەڭىل مۇناي كوزدەرىن تولىق اشىپ بولدى. ەندىگى كەزەكتە تەرەڭدىكتەگى مۇناي كوزدەرىن زەرتتەۋ مىندەتى تۇر. بۇل ءۇشىن قارا التىن ءوندىرۋشى ەلدەردىڭ عالىمدارى بولاشاق جوبالاردى بىرلەسە جۇزەگە اسىرماق نيەتتە.
يۋريي ۆولوج، ر ع ا گەولوگيالىق ينستيتۋتىنىڭ باس عىلىمي قىزمەتكەرى (رەسەي):
- تەرەڭدىكتەن مۇناي وندىرەتىن جاڭا تەحنولوگيالاردى وندىرىسكە ەنگىزبەسەك، ەرتەڭگى كۇندەرى تىعىرىققا تىرەلەمىز. بۇرىن 5 مىڭ مەتر جانە ودان تەرەڭ جەردەن تەك الماس بولماسا گاز عانا ىزدەۋ كەرەك دەگەن قاعيدا قالىپتاسقان بولاتىن. بۇل تۇجىرىمنىڭ قاتە ەكەندىگى بۇگىندە تولىعىمەن دالەلدەندى. قازىر وتە تەرەڭدە ورنالاسقان مۇناي قورلارى تابىلىپ جاتىر.
10-15 مىڭ مەتر تەرەڭدىكتەن مۇنداي ءوندىرۋ ءىسىن جاڭا تەحنولوگيالارعا نەگىزدەلگەن وندىرىستىك بازالار عانا يگەرە الادى. وسىعان بايلانىستى بولاشاقتا قازاقستاندىق ارنايى ماماندار توبى جاساقتالىپ، گەولوگ عالىمداردىڭ جاڭا تەحنولوگياسىن ءىس جۇزىندە سىناقتان وتكىزۋگە اتسالىساتىن بولادى.
