1-مامىردا تۇركيادا نە بولدى
استانا. KAZINFORM - تۇركيانىڭ كوپتەگەن قالالارىندا 1-مامىر - ەڭبەك جانە ىنتىماق كۇنى مەرەكەسىنە بايلانىستى ۇلكەن نارازىلىققا ۇلاسقان جاياۋ شەرۋلەر ءوتتى. ەڭ ۇلكەن شارالار ىستانبۇلدا بولعان. مەگاپوليستىڭ ءارتۇرلى بولىكتەرىندە كوپتەگەن ادامدارعا قارسى كۇش قولدانىلدى. بارلىعى 226 ادام ۇستالدى.
ىستانبۇل بيلىگى ازاماتتارعا 1-مامىر مەرەكەسىن تاكسيم الاڭىندا اتاپ وتۋگە تىيىم سالۋىنا بايلانىستى نارازىلىق بىلدىرگەن ادامدار توبى قاۋىپسىزدىك كۇشتەرىمەن قاقتىعىستى.
ايماق گۋبەرناتورى مەرەكەنى الاڭدا تويلاۋعا تىيىم سالعانىمەن، كاسىپوداقتار مەن ساياسي پارتيالاردىڭ وكىلدەرى شەرۋدى وعان قاراماستان وتكىزۋگە شەشىم قابىلدادى. ولار ورتالىق الاڭعا جاقىنداعان كەزدە پوليتسەيلەر كوزدەن جاس اعىزاتىن گاز بەن باسقا دا ارنايى قۇرالداردى قولدانا باستادى.
ىستانبۇل ورتالىعىنداعى تاكسيم الاڭىنىڭ كاسىپوداقتار مەن وپپوزيتسيا ءۇشىن سيمۆولدىق ءمانى بار. بەلسەندىلەر 1977 -جىلعى 1-مامىرداعى وقيعانى ەسكە الۋ ءۇشىن سول جەردە ميتينگ وتكىزبەك بولعان. سول جىلى وسى الاڭدا كوپتەگەن شەرۋشىلەر وققا ۇشتى. بۇل وقيعاعا 500 مىڭعا جۋىق ادام قاتىستى. ءتۇرلى دەرەككوزدەرگە سايكەس، وق اتۋ سالدارىنان 40 تان استام ادام قازا تاۋىپ، 220 دان استام ادام جاراقات العان.
الاڭ سونىمەن قاتار وپپوزيتسيا ءسوز سويلەيتىن ورىنعا اينالدى. 2013 -جىلى مۇندا ەل ۇكىمەتىنىڭ وسى اتتاس الاڭنىڭ جانىندا ورنالاسقان تاكسيم-گەزي ساياباعى ورنىندا قۇرىلىس جۇمىستارىن جۇرگىزۋگە قارسى نارازىلىق شارالارى باستالدى. ولار تۇركيانىڭ سول كەزدەگى پرەمەر-ءمينيسترى جانە قازىرگى پرەزيدەنتى رەجەپ تايپ ەردوعانعا قارسى جالپى ۇلتتىق شەرۋلەرگە ۇلاستى. نارازىلىق شەرۋلەرى باسىلعان سوڭ تۇرىك بيلىگى ايماقتا ۇكىمەتكە قارسى جيىندار وتكىزۋگە تىيىم سالدى.
كەشە - 1-مامىردا تاكسيم الاڭىنا يستيكليال داڭعىلى بويىنداعى تۇيىق كوشەلەر ارقىلى وتپەك بولعان ءتۇرلى توپتاردىڭ جاياۋ شەرۋىنە پوليسيا ارالاستى. قولدارىنا ترانسپارانتتار مەن پلاكاتتار ۇستاعان ازاماتتارعا توسقاۋىل قويىلدى. 20 دان استام ادام ۇستالدى.
قۇقىق قورعاۋشىلار سونداي-اق تاكسيم الاڭىنا بەشىكتاش اۋدانىنان جاياۋ بارماق بولعان ادامداردىڭ شەرۋىنە دە ارالاستى. ۇراندار ايتقان ءبىر توپ ازامات قاماۋعا الىندى.
بۇدان باسقا، قولدارىنا ترانسپارانت العان ءتۇرلى ساياسي پارتيالار مەن جاستار قوزعالىسىنىڭ ءبىر توپ ادامى دا تاكسيمگە جاياۋ جەتۋگە ارەكەتتەندى. پوليتسيا ولاردى شيشلي ايماعىندا توقتاتتى. بيلىككە قارسى ۇراندار ايتقان ازاماتتار ۇستالدى. شەرۋ توبەلەسكە ۇلاستى. پوليتسيا دەمونسترانتتاردى تىنىشتاندىرۋ ءۇشىن كۇش قولدانۋعا ءماجبۇر بولدى.
كۋرتۋلۋش اۋدانىندا دا تاكسيم الاڭىنا شەرۋگە شىققىسى كەلگەندەرگە ءتارتىپ ساقشىلارى كەدەرگى جاسادى. ءى ءى م- ءنىڭ ارنايى بولىمشەلەرى 10 نان استام ادامدى ۇستادى. ولار پوليتسيا ۋچاسكەلەرىنە جەتكىزىلدى.
سونىمەن بىرگە دولاپدەرە ايماعىنان تاكسيمگە جاياۋ بارماق بولعان قالىڭ توپ ازاماتتىڭ جاياۋ جۇرۋىنە پوليتسيا توسقاۋىل جاسادى. كوپ رەت ەسكەرتۋ جاسالعانىنا قاراماستان قارسىلىق تانىتقان 5 ادام ۇستالدى.
سونداي- اق، پروفەسسور دجەميل تاشدجيوگلۋ اتىنداعى قالالىق اۋرۋحانا عيماراتىنىڭ جانىنا ءتۇرلى كاسىپوداق مۇشەلەرىنىڭ اراسىنان ادامدار جينالا باستادى. ولار دا تاكسيم الاڭىنا شەرۋدى جوسپارلاعان. پوليتسيا جينالعانداردى تاراتىپ، ەڭ بەلسەندى ازاماتتاردى ۇستادى.
تۇركيا ىشكى ىستەر ءمينيسترى ءالي يەرليكايانىڭ مالىمدەمەسى بويىنشا، رۇقسات ەتىلمەگەن شەرۋلەر مەن ميتينگىلەردى توقتاتۋ قورىتىندىسى بويىنشا بارلىعى 226 ادام ۇستالدى. بۇل رەتتە 28 ءتارتىپ ساقشىسى جەڭىل جاراقات الدى.
