فۋتبولدان چەمپيوندار ليگاسىنىڭ 1/8 فينالىنا جەرەبە قايتا تاستالادى

نۇر-سۇلتان. قازاقپارات - ەۋروپا فۋتبول قاۋىمداستىقتارىنىڭ وداعى (ۋ ە ف ا) چەمپيوندار ليگاسىنىڭ 1/8 فينالىنا قايتادان جەرەبە تاستايدى.

تەحنيكالىق اقاۋلاردىڭ سالدارىنان شارا كەزىندە ورەسكەل قاتەلىكتەر بولعان.

بۇل تۋرالى ۋ ە ف ا- نىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات.

«قاي كوماندالاردىڭ ءبىر-بىرىمەن ويناۋعا قۇقىعى بار ەكەنىن رەسمي تۇلعالارعا حابارلايتىن قىزمەتتەردى ۇسىنۋشى باعدارلامالىق جاساقتامادا تۋىنداعان تەحنيكالىق اقاۋلاردىڭ سالدارىنان چەمپيوندار ليگاسىنىڭ 1/8 فينالىنا جەرەبە تاستاۋ كەزىندە ورەسكەل قاتەلىك بولدى»، - دەلىنگەن ۋ ە ف ا- نىڭ باسپا ءسوز قىزمەتىنىڭ حابارلاماسىندا.

دۇيسەنبى كۇنى شۆەيتساريانىڭ نون قالاسىندا وتكەن جەرەبە تاستاۋ قورىتىندىسى بويىنشا، انگليالىق «مانچەستەر يۋنايتەد» فرانسۋزدىق پ س ج- مەن، پورتۋگاليالىق «بەنفيكا» مادريدتىك «رەالمەن»، يسپانيالىق «ۆيلياررەال» اعىلشىندىق «مانچەستەر سيتيمەن»، يسپانيالىق «اتلەتيكو» گەرمانيالىق «باۆاريامەن»، اۋستريالىق «زالتسبۋرگ» اعىلشىندىق «ليۆەرپۋلمەن»، يتاليالىق «ينتەر» نيدەرلاندىلىق «اياكسپەن»، پورتۋگاليالىق «سپورتينگ» يتاليالىق «يۋۆەنتۋسپەن»، فرانسۋزدىق «ليلل» اعىلشىندىق «چەلسيمەن» ويناۋى كەرەك بولاتىن.

جەرەبە تاستاۋ كەزىندە «زەنيتتىڭ» قۇرامىندا ەۋروپا چەمپيوناتىنىڭ قولا جۇلدەگەرى، ۋ ە ف ا كۋبوگىنىڭ جانە سۋپەركۋبوگىنىڭ جەڭىمپازى اتانعان اندرەي ارشاۆين يسپانيالىق «ۆيلياررەالدىڭ» قارسىلاسىن انىقتاۋ كەزىندە «مانچەستەر يۋنايتەد» شارىن شىعاردى.

كوماندالار 1/8 فينال كەزىندە ءبىر توپتا بولعاندىقتان، ءبىر-بىرىمەن كەزدەسە المادى.

«مانچەستەر يۋنايتەد» شارى «اتلەتيكونىڭ» بولاشاق قارسىلاستارىمەن ءبىر قورجىنعا سالىنباعان ەدى.

بۇل جاعدايدان كەيىن «اتلەتيكو» جەرەبە تاستاۋ قورىتىندىسىنا نارازىلىق ءبىلدىردى. قايتادان جەرەبە تاستاۋ ءراسىمى دۇيسەنبى كۇنى قايتا باستالماق.

1/8 فينالدىڭ العاشقى ماتچتارى 15، 16، 22- جانە 23- اقپان كۇندەرى وتەدى.

جاۋاپتى ماتچتار 8، 9، 15- جانە 16- ناۋرىزعا جوسپارلانعان.

چەمپيوندار ليگاسىنىڭ فينالى 28- مامىر كۇنى سانكت-پەتەربۋرگ قالاسىندا بولادى.