«التىن وردا» بازارىندا 1,6 ميلليارد تەڭگە كولەمىندە زاڭبۇزۋشىلىق انىقتالدى
بۇل تۋرالى ق ر ساۋدا جانە ينتەگراتسيا مينيسترلىگى ساۋدا كوميتەتى ءتوراعاسىنىڭ ورىنباسارى ايدار ابىلدابەكوۆ ءمالىم ەتتى، دەپ حابارلايدى قازاقپارات ءتىلشىسى.
«التىن وردا» - ەلىمىز بويىنشا عانا ەمەس، ورتالىق ازياداعى ەڭ ءىرى بازارلاردىڭ ءبىرى. اۋماعى - 28-29 گەكتار. وزدەرىڭىز بىلەتىندەي، مەملەكەت باسشىسىنىڭ تىكەلەي تاپسىرماسىنا سايكەس، باس پروكۋراتۋرا ەلىمىزدەگى ساۋدا ورىندارى مەن بازارلاردىڭ قىزمەتىن تەكسەرۋدى مىندەتتەدى. وسى ورايدا، بارلىق وڭىردە ارنايى توپ قۇرىلدى. ونىڭ قۇرامىنا جەرگىلىكتى اكىمدىك، سالىق، ساۋدا دەپارتامەنتى، باسەكەلەستىكتى قورعاۋ جانە دامۋ دەپارتامەنتى مەن باسقا دا قۇزىرلى ورگان وكىلدەرى كىردى. وسىلايشا، «التىن وردا» بازارىنىڭ قىزمەتىن 70 ادامنان تۇراتىن توپ تەكسەردى. تەكسەرۋ بارىسىندا 1 ميلليارد 600 ميلليون تەڭگە كولەمىندەگى كەمشىلىك تابىلدى»، - دەدى ايدار ابىلدابەكوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، تەكسەرۋ قورىتىندىسى ءالى تولىق شىقپاعان.
«ايتار بولساق، كەيبىر نىساندار زاڭسىز سالىنعان. اتالعان بازاردى تەكسەرۋدىڭ تولىق قورىتىندىسى بىزگە ءالى كەلمەدى. ويتكەنى، جۇمىس اۋقىمدى. مەنىڭ ايتىپ وتىرعانىم - العاشقى دەرەكتەر»، - دەيدى ول.
مينيسترلىك وكىلى كەلتىرگەن ستاتيستيكاعا سايكەس، بۇگىندە ەلىمىزدە 761 بازار بار، ونىڭ 515 دە ازىق-تۇلىك ساتىلادى.
بۇعان دەيىن حابارلاعانىمىزداي، ەلىمىزدە كەيبىر ءىرى بولشەك ساۋدا بازارلارى نارىق باعاسىمەن ساناسپايدى. سونداي-اق، قازاقستاندا بازار يەلەرىنە جەكە جاۋاپكەرشىلىك جۇكتەلمەك.
