جىل باسىنان بەرى ەلىمىزدە اۋە كولىگىمەن 1,6 ميلليون جولاۋشى تاسىمالداندى
بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگىنەن ءمالىم ەتتى، دەپ حابارلايدى قازاقپارات ءتىلشىسى.
«ستاتيستيكا كوميتەتىنىڭ دەرەكتەرىنە سايكەس، 2020-جىلدىڭ 1- توقسانىندا تاسىمالدانعان جولاۋشىلار سانى 1 ميلليون 687 مىڭ ادامدى قۇرادى. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 5,2 پايىزعا (2019-جىلى - 1 ميلليون 604 مىڭ ادام) كوپ»، - دەلىنگەن مينيسترلىكتىڭ Telegram پاراقشاسىندا جاريالانعان اقپاراتتا.
ۆەدومستۆو مالىمەتىنشە، ناۋرىز-ءساۋىر ايلارىندا قازاقستاندا اۋە كولىگىمەن جولاۋشى تاسىمالى 70 پايىزعا قىسقاردى. ويتكەنى، 1- ساۋىردەن باستاپ توتەنشە جاعدايلار مەملەكەتتىك كوميسسياسىنىڭ تاپسىرماسىن ورىنداۋ اياسىندا قازىرگە دەيىن 97 حالىقارالىق باعىت بويىنشا اپتاسىنا 440 رەيس نەمەسە بارلىق حالىقارالىق رەيستىڭ 99 پايىزى قىسقارتىلدى.
1- ساۋىردەن 1- مامىرعا دەيىن بارلىق تۇراقتى ىشكى رەيستەر دە توقتاتىلدى.
