بيىل قۇرىق پورتى جۇكتەردى جونەلتۋدەن 1,6 ميلليارد تەڭگە تابىس تاپتى

اقتاۋ. قازاقپارات - بيىل قۇرىق تەڭىز پورتى ىسكە قوسىلعانىنا - 3 جىل. سول ۋاقىتتان بەرى 1394 كەمە ءجۇرىپ وتكەن. ال، جۇكتەردى اۋىستىرىپ تيەۋ 4,3 ميلليون توننانى قۇراپ وتىر، دەپ حابارلايدى قازاقپارات ءتىلشىسى.

قازىر تەڭىز پورتىندا 2 تەمىرجول، 1 اۆتوموبيل جولى پارومدىق كەشەنى جۇمىس ىستەپ تۇر. قۇرىق پورتىنىڭ پاروم كەشەنى زاماناۋي ينفراقۇرىلىمدىق قوندىرعىلارمەن جابدىقتالعان. جالپى جوبالىق قۋاتتىلىعى - 6 ميلليون توننا. 2019 -جىلدىڭ ون ءبىر ايىنداعى كورسەتكىش بويىنشا، 1,2 ميلليون توننادان استام ءارتۇرلى جۇك جونەلتىلگەن، 1,6 ميلليارد تەڭگە تابىس تۇسكەن. جۇكتەردىڭ 760 مىڭ تونناسى يمپورتتالىپ، 485 مىڭ تونناسى ەكسپورتقا جونەلتىلگەن.

زاماناۋي ينفراقۇرىلىمدارمەن جابدىقتالعان تاۋەلسىز قازاقستاننىڭ العاشقى پورتىنىڭ كەلەشەككە جاڭا جوسپارى كوپ. جۋىردا عانا «كاسپيي حالىقارالىق ترانزيتتىك مارشرۋتى» قاۋىمداستىعىنا مۇشە بولعان قازاقستاندىق پورت ءوز الەۋەتىن ارتتىرۋ ءۇشىن كورشى مەملەكەتتەرمەن كەلىسسوزدەر جۇرگىزىپ جاتىر.

«قازىرگى ۋاقىتتا قازاقستاندىق استىق، كومىر، مۇناي ونىمدەرى، تىڭايتقىشتار، حيميالىق زاتتار قۇرىق پورتىنىڭ پاروم كەشەنى ارقىلى ەكسپورتتالادى. پورت ارقىلى ءتۇرلى جابدىقتار، ەلەكترونيكا، توقىما، حيميالىق ونىمدەر، مەتالل بۇيىمدارى جانە تاعى باسقالار وتەدى. تۇتاستاي العاندا، پورتتىڭ تەمىرجول جانە اۆتوموبيل ينفراقۇرىلىمى قۇرىق پورتى ارقىلى ازەربايجان مەن گرۋزياعا، تۇركيامەن شىعىس ەۋروپاعا جىبەرۋگە مۇمكىندىك بەرەدى. جالپى، مۇندا پاروم كەشەنى ىسكە قوسىلعالى كىرىس 4 ميللياردتان استام تەڭگەنى قۇرادى»، - دەدى پورتتىڭ باس ديرەكتورى سەرىك جەتپىسباي ۇلى.

ازيا مەن ەۋروپانى تەڭىز ارقىلى جالعايتىن سۋ جولىنىڭ بويىندا تۇرعان پارومدا 200-گە جۋىق ادام جۇمىسپەن قامتىلعان. بارلىق قىزمەتكەرلەر ءۇشىن قولايلى جاعدايلار جاسالعان. جايلى جاتاقحانا، كۇنىنە 3 رەت تاماقتاناتىن اسحانا جانە باسكەتبول الاڭدارى قاراستىرىلعان.