بيىل ۇلتتىق قوردان 1 تريلليون 636 ميلليارد تەڭگە جۇمسالادى

نۇر- سۇلتان. قازاقپارات - ق ر پارلامەنتى ءماجىلىسىنىڭ دەپۋتاتى ايبەك پايايەۆ تاۋ- كەن سالاسىن اكىمشىلەندىرۋ شارالارىن قايتا قاراۋدى ۇسىندى، دەپ حابارلايدى قازاقپارات ءتىلشىسى.

«ق ر ۇلتتىق قورىنان 2022-2024 -جىلدارعا كەپىلدەندىرىلگەن ترانسفەرت تۋرالى» ق ر زاڭىنا وزگەرىس ەنگىزۋ تۋرالى» زاڭ جوباسى قارالىپ جاتىر.

جيىن بارىسىندا ب ا ق وكىلدەرىنە سۇحبات بەرگەن ءماجىلىس دەپۋتاتى ايبەك پايايەۆ ناقتىلانعان بيۋدجەتتىڭ شىعىس بولىگى، جالپى العاندا، ورىندى دەگەپ پىكىر ايتتى.

«بيۋدجەتتىڭ شىعىس جاعى ۇلعايىپ جاتقانىن بىلەسىزدەر. ونىڭ ناقتى سەبەپتەرى بار. قاڭتاردىڭ باسىندا پرەزيدەنت بىرنەشە تاپسىرما بەردى. جولداۋىندا دا ايتىپ كەتتى. وسى تاپسىرمانىڭ ءبارىن جۇزەگە اسىرۋ ءۇشىن قوماقتى قاراجات ءبولىنىپ وتىر. بيۋدجەتتىڭ شىعىس بولىگى 4 تريلليون تەڭگەگە ۇلعايدى دەسەك، ونىڭ ىشىندە ۇلتتىق قوردان قوسىمشا 1 تريلليون 636 ميلليارد تەڭگە ءبولىنىپ جاتىر. ارينە، ۇلكەن اقشا. ونىڭ ءبارى ەلدەگى تۇراقتىلىقتى ساقتاپ، مەملەكەت ەكونوميكاسىنىڭ ءارى قاراي دامۋىنا ۇلەس قوسۋعا، وڭىرلەردى دامىتىپ، ەڭ باستى ماسەلە، بۇل قاراجاتتىڭ ءبارى حالىققا تولىعىمەن جەتۋى كەرەك. سونداي- اق، كەلەشەكتە سالىق بازاسىن كەڭەيتۋ ارقىلى ۇلتتىق قورعا قايتىپ ءتۇسۋى كەرەك»، - دەدى ول.

دەپۋتات كەلەشەكتە ۇلتتىق قورعا قول جايا بەرمەس ءۇشىن فيسكالدىق ساياساتتى قايتا قاراۋ كەرەك دەگەن پايىم ايتتى.

«مەن ۇلتتىق ەكونوميكا مينيسترلىگىنە سۇراق قويىپ وتىرمىن. كەلەشەكتە سالىق بازاسىن ۇلعايتۋ ارقىلى، جالپى تاۋ- كەن سالاسىنداعى اكىمشىلەندىرۋدى ساپالى جۇزەگە اسىرۋ ارقىلى، سول جەردەگى سالىقتىق جۇكتەمەنى قايتا قاراۋ ارقىلى بيۋدجەتكە قوماقتى قاراجات تۇسىرۋگە بولادى. ءبىز ونى مىندەتتى تۇردە ىستەۋىمىز كەرەك. ويتكەنى بيىل فيسكالدىق ورگاندار رەسپۋبليكالىق بيۋدجەتتىڭ كىرىس بولىگىن 955 ميلليارد تەڭگە ارتىعىمەن ورىنداۋى كەرەك»، - دەدى ايبەك پايايەۆ.

ايتا كەتەيىك، بۇعان دەيىن ق ر ۇلتتىق ەكونوميكا ءمينيسترى الىبەك قۋانتىروۆ جۋرناليستەرگە ۇلتتىق قوردان كەپىلدەندىرىلگەن ترانسفەرتتى ناقتىلاۋ نە ءۇشىن قاجەت بولعانىن تۇسىندىرگەن بولاتىن.

اۆتور: ەسىمجان ناقتىباي