رەسەيدەن تەڭىز ارقىلى جەتكىزىلەتىن شيكىزاتتىڭ 1 باررەلىنىڭ قۇنى 60 دوللاردان اسپايتىن بولادى
بۇگىننەن باستاپ ەۋرووداقتا ءتيىستى تالاپ كۇشىنە ەندى. بۇل ۋكرايناداعى شيەلەنىسكە بايلانىستى ماسكەۋگە قارسى سالىنعان 6- سانكسيا اياسىندا قابىلدانعان شارا. ءبىراق شەشىم نە كيەۆتىڭ، نە كرەملدىڭ كوڭىلىنەن شىقپادى.
بۇعان دەيىن ەۋروپا ەلدەرىنە جەتكىزىلەتىن مۇنايدىڭ % 20 رەسەيگە تيەسىلى ەدى. الايدا ۋكرايناداعى شيەلەنىسكە بايلانىستى ەۋرووداق جازدا قارا التىن ەكسپورتىنا بىرتىندەپ شەكتەۋ ەنگىزە باستادى. ونى ۇلكەن جەتىلىك ەلدەرى مەن اۆستراليا دا قولدادى. ەندى بۇگىننەن باستاپ رەسەيدەن تەڭىز ارقىلى تاسىلمالداناتىن شيكىزاتتىڭ ءبىر باررەلىنىڭ قۇنى 60 دوللاردان اسپاۋى ءتيىس. ءبىراق بۇل ءتيىمسىز. ويتكەنى بۇگىن نارىقتا مۇنايدىڭ ءبىر باررەلى 86 دوللار شاماسىندا ساۋدالانىپ جاتىر. ەرەجەگە باعىنباعاندارعا ايىپپۇل سالىنادى. بۇعان قوسا، رەسەيلىك مۇناي ونىمدەرىنىڭ دە باعاسى شەكتەلەدى. ءبىراق ءتيىستى تالاپ تەك ەكى ايدان كەيىن، ياعني 5- اقپاندا كۇشىنە ەنەدى. قارا التىن قۇنى كۇن سايىن وزگەرىپ وتىراتىنى تۇسىنىكتى. سوندىقتان شەكتى باعا 2-ايدا 1 رەت قايتا قاراستىرىلادى.
ماسكەۋ بۇل شەشىممەن كەلىسپەيتىنىن جەتكىزدى. رەسەي پرەزيدەنتىنىڭ باسپا ءسوز حاتشىسى دميتريي پەسكوۆ بۇل شەكتەۋ شاراسى الەمنىڭ ەنەرگەتيكالىق نارىعىن تۇراقسىنداندىرۋعا باعىتتالعانىن ايتتى. سوندىقتان بۇعان جاۋاپ رەتىندە قارسى شارا قولدانامىز- دەدى. ءبىراق نە جوسپارلانىپ وتىرعانىن ناقتىلاعان جوق. بىلتىر رەسەيگە ەكسپورتتان تۇسكەن پايدانىڭ % 37 مۇناي ونىمدەرى قۇرادى.
باتىس ەلدەرىنىڭ شەشىمىنە ۋكراينانىڭ دا كوڭىلى تولمادى. ويتكەنى كيەۆ شەكتى باعانى 60 ەمەس، 30 دوللار شاماسىندا بەكىتۋدى ۇسىنعان. بۇل باستامانى بالتىق ەلدەرى مەن پولشا دا قولداعان. الايدا ساراپشىلار رەسەيلىك قارا التىنىڭ ازياداعى ءىرى ساتىپ الۋشىلارى قىتاي مەن ءۇندىستاننىڭ بۇل شەشىمدى ماقۇلداۋى ەكىتالاي دەپ سانايدى. رەسەي شيكىزاتىنىڭ شەكتى باعاسىن بەكىتۋ باستاماسىنان كەيىن الەمدە قارا التىن باعاسى ءوستى. بۇعان و پ ە ك شەشىمى دە اسەر ەتكەن. كەشە مۇناي ەكسپورتتاۋشى ەلدەر ۇيىمى شيكىزات ءوندىرۋ جوسپارىن وزگەرتپەي، سول كۇيىندە قالدىرۋعا ۋاعدالاسقان. ساراپشىلار باعانىڭ وسۋىنە قىتايدا كوروناۆيرۋسقا قاتىستى شەكتەۋ شارالارىنىڭ جەڭىلدەۋى دە اسەر ەتكەنىن ايتادى.
