قاراعاندىدا بالالاردىڭ جاپپاي ۋلانۋى: ورتالىققا بيىل 1,5 ميلليارد تەڭگە بولىنگەن

بۇل تۋرالى ورتالىققا ارنايى بارعان قازاقپارات ءتىلشىسى ءبىلىپ قايتتى.
«قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعى» ك م م 1977 -جىلى قۇرىلعان. بۇل مەكەمەدە 1,5 جاستان 18 جاسقا دەيىنگى پسيحونيەۆرولوگيالىق اۋرۋلارى بار مۇگەدەك بالالار تاربيەلەنەدى. قازىرگى ۋاقىتتا ورتالىقتا 202 بالا الەۋمەتتىك قىزمەت الادى، ونىڭ 160 ى ستاتسيونار جاعدايىندا تۇرسا، 42 ى جارتىلاي ستاتسيونار جاعدايىندا كۇندىزگى بولىمشەدە ەم الادى.
سونداي-اق، بالالار جىنىستىق بەلگىلەرى بويىنشا 6 توپقا بولىنگەن. بۇل 30-شىلدەدە ورتالىقتا تەك ۇلدار ۋلانعانىنىڭ سەبەبىن تۇسىندىرەدى. ول بالالار ءبىر توپتا بولعان.
جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ اقپاراتى بويىنشا، 2022 -جىلى ورتالىققا 1313004000 تەڭگە، ال 2023 -جىلى - 1456287000 تەڭگە قاراجات بولىنگەن. اتالعان ورتالىق وسىنداي قىرۋار اقشاعا قانداي قىزمەت كورسەتەدى دەگەن سۇراققا بىلايشا جاۋاپ بەردى:
«قاراعاندى وبلىسىنىڭ بالالارعا ارناۋلى الەۋمەتتىك قىزمەتتەر كورسەتۋ ورتالىعى» كمم ارناۋلى الەۋمەتتىك قىزمەتتەردىڭ كەپىلدى كولەمىن كورسەتەدى، وعان 8 قىزمەت كىرەدى: الەۋمەتتىك- تۇرمىستىق؛ الەۋمەتتىك- مەديتسينالىق؛ الەۋمەتتىك- پسيحولوگيالىق؛ الەۋمەتتىك- پەداگوگيكالىق؛ الەۋمەتتىك- ەڭبەك؛ الەۋمەتتىك- مادەني؛ الەۋمەتتىك- ەكونوميكالىق؛ الەۋمەتتىك- قۇقىقتىق قىزمەتتەر»، - دەپ حابارلادى ۆەدومستۆودان.
سونداي-اق، بريفينگ بارىسىندا جۋرناليستەر قاراعاندى وبلىسىنىڭ اكىمىنە ونىڭ ورىنباسارى وسى مەكەمەگە بۇرىن- سوڭدى بارعان- بارماعانى تۋرالى سۇرادى. بەلگىلى بولعانداي، اكىمنىڭ ورىنباسارى وسىعان دەيىن ورتالىقتىڭ جۇمىسىمەن تانىسۋ ءۇشىن بۇل مەكەمەدە ەكى رەت بولعان ەكەن. ءتىپتى تاربيەلەنۋشىلەرگە قاجەتتى قوسىمشا نىسان سالۋ ماسەلەسىن تالقىلاعانىن جەتكىزدى.
«مەن بۇل ورتالىققا ەكى رەت باردىم. ءبىز وسى بالالارعا ارنالعان مونشا مەن شاعىن باسسەين سالۋ جوباسىن تالقىلادىق. اقپان ايىندا بۇل مەكەمە پروكۋراتۋرامەن بىرلەسىپ تەكسەرىلدى. ول كەزدە مۇنداي بۇزۋشىلىقتار بولعان جوق، باسقا قۇقىق بۇزۋشىلىقتار بولدى»، - دەپ اتاپ ءوتتى قاراعاندى وبلىسى اكىمىنىڭ ورىنباسارى ەرمەك الپىسوۆ.
تاربيەلەنۋشىلەر ءۇشىن مونشا مەن باسسەيننىڭ قاجەتتىلىگى تۋرالى ماسەلەنى ورتالىقتىڭ ديرەكتورى ايمان جاعىپاروۆا كوتەرگەن بولاتىن. ول اتالمىش مەكەمەنى 2019 -جىلدان باستاپ باسقارىپ كەلەدى. بەلگىلى بولعانداي، ول 24-شىلدەدەن باستاپ ەڭبەك دەمالىسىندا بولعان.
جالپى ورتالىقتا 374 قىزمەتكەر جۇمىس ىستەيدى. سوتقا دەيىنگى تەرگەۋ اياقتالعانعا دەيىن تەكسەرۋ كەزىندە ورتالىق ديرەكتورىنىڭ مىندەتىن اتقارۋشى جانە وسى ورتالىقتىڭ 12 مەديتسينا قىزمەتكەرى جۇمىستان جانە ءوز مىندەتتەرىن ورىنداۋدان شەتتەتىلدى. بۇل قىزمەتكەرلەردىڭ ورنىنا قازىر باسقا مەديتسينالىق مەكەمەلەردىڭ مەديتسينا قىزمەتكەرلەرى جۇمىلدىرىلعان.
«ءوز تاراپىمنان اتالمىش توتەنشە جاعداي نازارسىز قالمايتىنىنا سەندىرگىم كەلەدى. كىنالىلەر زاڭ تالاپتارىنا سايكەس قاتاڭ جازالانادى. تەرگەۋ ورگاندارى بارلىق قاجەتتى شارالاردى جۇرگىزەدى. ءبىز ءۇشىن قازىر ەڭ باستىسى - بالالاردىڭ ءومىرىن ساقتاپ قالۋ»، - دەدى قاراعاندى وبلىسىنىڭ اكىمى ەرماعانبەت بولەكپايەۆ.
ەسكە سالا كەتەيىك، 30-شىلدەدە قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا بىرنەشە بالا ۋلانىپ، ولاردىڭ بىرەۋى قازا تاۋىپ، التاۋى جانساقتاۋ بولىمىندە جاتىر.
باس پروكۋراتۋرا ۋاكىلەتتى مەملەكەتتىك ورگاندار مەن اۋماقتىق پروكۋرورلارعا ەلدە وسىنداي مەكەمەلەرگە كەشەندى تەكسەرۋلەر ۇيىمداستىرۋدى تاپسىردى.
ق ر دەنساۋلىق ساقتاۋ ءمينيسترى اجار عينيات حابارلاعانداي، ىشەك ينفەكتسيالارىنا جۇرگىزىلگەن سىناقتار تەرىس ناتيجە بەردى. بالالاردىڭ ۋلانۋىنىڭ ناقتى سەبەبى ءالى انىقتالعان جوق.