قازاقستاندا كوزدىڭ قاساڭ قابىعىن اۋىستىرعىسى كەلەتىن 1,5 مىڭ ادام بار

استانا. قازاقپارات - قازاقستان حالقىنا قورىنىڭ ءتوراعاسى بولات جامىشيەۆ ەلدەگى مۇردە دونورلىعىنىڭ ماسەلەسى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«بىزدە كوزدىڭ قاساڭ قابىعىن اۋىستىرعىسى كەلەتىن مىڭ جارىم ادام بار. قازىر ەندى ويلانىپ وتىرمىز، نە ىستەۋىمىز كەرەك، ۇكىمەتكە جۇگىنىڭىزدەر دەيمىز. اعزا الماستىرۋشى دارىگەرلەردىڭ ءبارى بىزگە سىزدەردىڭ قوردىڭ اقشاسى كەرەك ەمەس، بىرنەشە جىل بۇرىن جويىلعان مۇردە دونورلىعىن قايتارىپ بەرىڭىزدەر دەگەندى ايتادى. ەلىمىزدە مۇردە دونورلىعى بولۋى كەرەك دەپ وتىر. كوزدىڭ قاساڭ قابىعىن تابۋ ىسىندە ەشقاشان ماسەلە تۋىنداپ كورمەگەن ەدى. دونورلار كوپتەپ كەلەتىن. سوندا قازىر تىيىمنىڭ سالدارىنان الەمىنىڭ تۇكپىر- تۇكپىرىنەن كوزدىڭ قاساڭ قابىعىن ساتىپ العان دۇرىس پا، الدە زاڭنامانى وزگەرتۋ وڭاي بولا ما؟ مىڭ جارىم ادام كوزدىڭ قاساڭ قابىعىن اۋىستىرۋ وتاسىنا مۇقتاج. ولاردىڭ ءبارى قاشانعى كۇتىپ وتىرا الادى ؟ قاي جولمەن جۇرەتىنىمىزدى ويلاپ وتىرمىز»، - دەدى ول ب ا ق وكىلدەرىمەن وتكەن باسپا ءسوز كونفەرەنتسياسىندا.

ونىڭ ايتۋىنشا، پيلوتتىق جوبا اياسىندا 12 ادامعا وسىنداي وتا جاسالىپ جاتىر. ال قاجەتتى دونوردىڭ ءبارىن ا ق ش- تان تاپقان.

«ءبىز باستاعان پيلوتتىق جوبا، بۇل جوبانى قولعا الامىز با، جوق پا، دەگەن سۇراققا جاۋاپ تابا الامىز. زاڭدى وزگەرتۋ كوزدىڭ قاساڭ قابىعىن بۇكىل الەمنەن ىزدەپ جۇرگەنننەن الدەقايدا وڭاي. بۇل تۋرالى مەن جۇرگەن جەرىمنىڭ بارىندە ايتىپ ءجۇرمىن»، - دەدى بولات جامىشيەۆ.