شەكارا ماڭىنداعى تۇرعىندارىنىڭ جالاقىسى مەن ەڭبەك وتىلىنە 1,5 كوەففيتسيەنت قوسۋ ۇسىنىلدى
«پرەزيدەنت قاسىم-جومارت توقايەۆ شەكارالىق ايماقتاردى دامىتۋدىڭ ناقتى شارالارىن قاراستىرۋ قاجەتتىگىن ايتقان ەدى. «AMANAT» پارتياسى شەكارالىق اۋداندارىڭ الەۋمەتتىك-ەكونوميكالىق ماسەلەلەرىن جۇيەلى شەشۋ كەرەك دەپ ەسەپتەيدى. وسىعان وراي، حالىقتى تۇراقتاندىرۋ، ىنتالاندىرۋ ەسەبىندە ەڭبەك ەتىپ جۇرگەن ازاماتتاردىڭ جالاقىلارىنا اۋداندىق 1,5 قوسىمشا كوەففيتسيەنت قوسۋ ماڭىزدى. اتالعان ادامداردىڭ ەڭبەك ءوتىلىنىڭ 1 جىلى 1,5 بولىپ سانالۋىن قاراستىرۋ قاجەت»، - دەدى ۇ. تۇمارشينوۆ ءماجىلىستىڭ بۇگىنگى وتىرىسىندا.
دەپۋتات تەك وسىنداي شارالاردىڭ ارقاسىندا جەتىسپەي تۇرعان دارىگەر، ۇستاز، مال دارىگەرلەرى، اگرونوم تاعى دا باسقا جاس مامانداردىڭ سول ايماقتاردا تۇراقتانۋىن ىنتالاندىرۋعا بولاتىنىن ايتتى.
«پرەزيدەنت بۇقتىرما سۋ قويماسى ۇستىنەن كوپىر سالۋعا تىكەلەي تاپسىرما بەردى. بۇل كوپىر، ەرتىس وزەنىنىڭ ارعى جاعىنداعى بەس شەكارالىق اۋدان - كۇرشىم، قاتونقاراعاي، مارقاكول، زايسان، تارباعاتاي حالقىنىڭ ءومىر بويعى ارمانى. كوپىر قۇرىلىسى قارقىندى ءجۇرىپ جاتىر، ءبىراق بيىلعا بولىنگەن قارجى كولەمى 4 ميلليارد تەڭگەنى قۇرايدى. بۇل قاجەتتى قارجىنىڭ وننان ءبىرى عانا. حالىققا اسا ماڭىزدى، قاجەتتى، كۇردەلى قۇرىلىس نىسانىن ۇكىمەت وسىلاي قارجىلاندىرسا، پرەزيدەنت تاپسىرماسى ونداعان جىلدارعا سوزىلىپ كەتەدى. ول كەزدە ايتىلعان شەكارالىق بەس اۋداندا حالىق قالماۋى دا مۇمكىن»، - دەدى ءماجىلىس دەپۋتاتى.