استانا مايدانگەرلەرىنە جەڭىس كۇنىنە وراي 1,5 ميلليون تەڭگەدەن بەرىلەدى
بۇل تۋرالى استانا قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب ايتتى، دەپ حابارلايدى قازاقپارات ءتىلشىسى.
«ەلوردادا بىلتىر ەكىنشى دۇنيەجۇزىلىك سوعىسقا قاتىسقان 18 ارداگەر بولسا، قازىرگى كەزدە قالادا 10 ارداگەر تۇرىپ جاتىر. 9- مامىردى (جەڭىس كۇنى) اتاپ ءوتۋ اياسىندا ارداگەرلەرگە قاتىستى ءتيىستى الەۋمەتتىك كومەك تۇرلەرى قاراستىرىلعان»، - دەدى يليا سكۋب استانا قالاسى كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
بۇل تۇرعىدا ول ارداگەرلەرگە اكىمدىك ءبىرجولعى تولەم جاسايتىنىن ايتتى.
«اتاپ ايتقاندا، ەكىنشى دۇنيەجۇزىلىك سوعىسقا قاتىسقان ارداگەرلەرگە 1531150 تەڭگە سوماسىندا تولەم اۋدارىلادى»، - دەدى باسقارما باسشىسى.
بۇدان بۇرىن حابارلانعانداي، جاقىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا بيىل ەكىنشى دۇنيەجۇزىلىك سوعىس ارداگەرلەرىنە ءتيىستى تولەم اۋدارىلاتىنىن ايتتى.
قازىرگى كەزدە ەلىمىزدە 237 ارداگەر بار.
