قازاقستان عالىمدارى 1,5 ميلليون تەڭگەگە دەيىن جالاقى الادى
بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى قازاقپارات ءتىلشىسى.
«عالىمدارىمىز ۇنەمى تۇراقتى جالاقى الماعاندىعى بەلگىلى. جالاقى كونكۋرستاردىڭ ناتيجەسىنە بايلانىستى. عالىمداردىڭ ورتاشا جالاقىسى 152 مىڭ تەڭگە بولدى. بۇل - ەكونوميكاداعى ورتاشا جالاقىنىڭ تەك 72 پايىزى عانا. بۇگىندە جۇمىس ىستەپ، جاريالانىمدارى شىعاتىن بارلىق جەتەكشى عالىمنىڭ جالاقىسىن 72 پايىزعا ارتتىردىق. جەتەكشى عالىمدارىمىز گرانتتاردىڭ ناتيجەسىنە تاۋەلدى بولماۋى ءۇشىن ىرگەلى عىلىمداردى بازالىق قارجىلاندىرۋ فورماتىن قايتاردىق. قازىرگى ۋاقىتتا 11 عىلىمي-زەرتتەۋ ينستيتۋتى تىكەلەي قارجىلاندىرىلادى»، - دەدى ساياسات نۇربەك ۆەدومستۆونىڭ كەڭەيتىلگەن القا ماجىلىسىندە.
ءمينيستردىڭ اتاپ وتۋىنشە، عالىمداردىڭ جالاقىسى ايتارلىقتاي ءوستى.
«وتكەن جىلدىڭ قورىتىندىسىنا سايكەس، بۇگىندە جالاقى - 257 مىڭ تەڭگە، ال ەڭ جوعارى جالاقى - 1,5 ميلليون تەڭگە. عىلىمدى قارجىلاندىرۋدى 3,5 ەسەگە ارتتىردىق. ەگەر عىلىمدى قارجىلاندىرۋ 2022-جىلى 58 ميلليارد تەڭگە بولسا، بيىل 158,6 ميلليارد تەڭگەگە جەتتى. 2024-جىلى 244 ميلليارد تەڭگە، 2025-جىلى 240 ميلليارد تەڭگە بولادى. عىلىمدى قارجىلاندىرۋ شامامەن 800 ميلليارد تەڭگە بولۋى ءتيىس. وسى دەڭگەيگە شىعۋ ءۇشىن جوسپارىمىزدا بار»، - دەدى ول.
