سوزاقتا شارۋا ۇزىندىعى 1,5 مەتر بولاتىن قاۋىن ءوسىرىپ، ونى «اناكوندا» دەپ اتادى

سوزاق. قازاقپارات - تۇركىستان وبلىسىنىڭ سوزاق اۋدانىندا قاۋىننىڭ ەرەكشە سورتى وسىرىلۋدە، دەپ حابارلايدى قازاقپارات ءتىلشىسى.

سوزاق اۋدانى، سوزاق اۋىلىنىڭ تۇرعىنى ءشارىپجان رىسمەتوۆتىڭ ەگىستىك القابى بيىل قاۋىننىڭ جاڭا سورتىمەن تولىقتى. ۇزىندىعى 1,5 مەتر، ەنى 7 سانتيمەتردى قۇرايتىن قاۋىننىڭ ءدامى وزگەشە. باسى جىلانعا ۇقسايتىندىقتان، جەمىستىڭ بۇل ءتۇرىن شارۋا «اناكوندا» دەپ اتاپتى.

«قاۋىننىڭ تابيعي تۇردە بۋدانداسىپ، سودان پايدا بولعان ءتۇرى. ءبىر تۇپتە ءۇش ءتۇرلى تارماق بولادى. سونىڭ ەكەۋىندە باسپالدى قاۋىن شىقتى دا، بىرەۋىنەن «جىلان» قاۋىن الدىق» - دەيدى ول.

شارۋا ەرەكشە سورتتى قاۋىننان 5 دانا عانا العان. ونى دا اۋىل تۇرعىندارى قىزىعىپ، ۇيلەرىنە الىپ كەتىپتى.

«العاشقىدا جاپىراقتاردىڭ اراسىنان كورگەندە جىلان ەكەن دەپ ويلاپ قالدىق. جۇمىسشىلاردا قورقىپ قاسىنا جولامادى. سودان كۇرەك پەن كەتپەندى قولىما الىپ، جاپىراقتارىن ءبىر شەتكە ىسىرىپ، جايمەن اشىپ قاراسام، كادۋەلگى قاۋىن ەكەن. كۇندەلىكتى كۇيبەڭ تىرلىكپەن ەكسپەرتيزاعا جىبەرۋگە مۇمكىندىك بولمادى» - دەيدى ءشارىپجان ايتىمەت ۇلى.

ايتا كەتەيىك، شارۋا 5 جىلدان بەرى قاۋىن- قاربىز ءوسىرىپ كەلەدى. بيىلدا 2,5 گەكتار جەرگە قاربىز، 1 گەكتار جەرگە قاۋىن ەگىپ، مول ءونىم الدى.

اۆتور

قايرات زاينيشيەۆ