رامازان ايىندا 1,5 مىڭنان استام وتباسىعا ازىق-تۇلىك سەبەتى تاپسىرىلادى
جىل باسىنان بەرى ەلوردانىڭ 10 مىڭنان استام تۇرعىنىنا جان-جاقتى الەۋمەتتىك كومەك كورسەتىلگەن.
ەندى «قايىرىمدى ىستەر» مارافونى اياسىندا تاعى دا 1,5 مىڭنان استام الەۋمەتتىك از قامتىلعان وتباسى ازىق-تۇلىك سەبەتىن الادى. قايىرىمدىلىق ءىس-شاراسىن قالا اكىمدىگى مەن دەمەۋشىلەر بىرلەسىپ ۇيىمداستىردى.
ازىق-تۇلىك جيىنتىقتارىن تاراتۋعا ق م د ب، ەرىكتىلەر جانە جاناشىر ازاماتتار ۇلكەن كومەك كورسەتۋدە. ال ازىق-تۇلىك سەبەتتەرىن جيناقتاۋ ازىرەت سۇلتان مەشىتىندە جۇرگىزىلدى، وسى جەردەن ەلوردانىڭ 4 اۋدانىنداعى مۇقتاج وتباسىلارعا تاسىمالداندى.
«بۇگىن قاسيەتتى رامازان ايىندا 1,5 مىڭ ازىق-تۇلىك سەبەتىن تاراتۋدى باستادىق. ازىق-تۇلىك جيىنتىقتارىن جاعدايى تومەن وتباسىلار الادى، ولاردىڭ اراسىندا ەرەكشە قاجەتتىلىگى بار بالالاردى تاربيەلەپ وتىرعان وتباسىلار، تولىق ەمەس وتباسىلار، مۇگەدەك جاندار، زەينەتكەرلەر، جەتىم بالالار، كوپبالالى انالار جانە ت. ب. بار. ازىق-تۇلىك جيىنتىعىندا ەڭ قاجەتتى تاۋارلار بار: ماي، ۇن، كۇرىش، جارما، قاراقۇمىق، قانت، شاي، تومات پاستاسى. ءبىر ازىق-تۇلىك سەبەتىنىڭ سالماعى - شامامەن 20-25 كيلوگرام»، - دەدى «استانا جاستارى» جاستار رەسۋرستىق ورتالىعىنىڭ ۆولونتەرى دامير ايتىموۆ.
ايتا كەتەيىك، بيىل ناۋرىز مەرەكەسى «قايىرىمدى ىستەر» مارافونىنىڭ اياسىندا ءوتتى. ناۋرىز ايىندا ازىق-تۇلىك جيىنتىعىن مىڭنان استام مۇقتاج وتباسى الدى. قايىرىمدىلىق قىزمەتتى جۇزەگە اسىرۋعا كاسىپكەرلەر، ءىرى ۇيىمدار، ەرىكتىلەر جانە قالا تۇرعىندارى كومەك كورسەتەدى.
«ساۋابى مول ءىس جاساۋ قاشاندا ماڭىزدى. مۇنداي يگى باستامالار كوبەيە بەرەدى دەپ ۇمىتتەنەمىز. قايىرىمدىلىق شارالارى كەز كەلگەن ادامنىڭ جۇرەگىنە جىلۋ سىيلايدى»، - دەدى ۆولونتەر.
ءوز كەزەگىندە سەبەت الۋشىلار ۇيىمداستىرۋشىلارعا جانە قايىرىمدىلىق اكسياسىنا قاتىسقاندارعا العىستارىن ءبىلدىردى.
«جىل سايىن وسىنداي سىيلىق الىپ تۇرامىز. بۇل بىزگە ۇلكەن جاردەم. سەبەتتە قاجەتتى تاماق ونىمدەرىنىڭ ءبارى بار. ءبىزدى نازاردان تىس قالدىرماي، قاسيەتتى رامازان ايىندا وسىنداي كومەك كورسەتكەندەرىڭىز ءۇشىن العىسىم شەكسىز. ەلىمىزدە تەك بەيبىتشىلىك بولسىن! دەمەۋشىلەرگە، ەرىكتىلەرگە جانە اكىمدىككە راقمەتىمدى ايتامىن!» - دەپ ءبولىستى ساپۋرا بايعۋانوۆا.
ازىق-تۇلىك سەبەتىن العانداردىڭ ءبىرى - نۇرگۇل ايماعامبەتوۆا ەرەكشە قاجەتتىلىكتەرى بار بالانىڭ اناسى. ول ەلوردا اكىمدىگىنە، مەتسەناتتار مەن ەرىكتىلەرگە العىسىن ءبىلدىردى.
ايتا كەتەيىك، جىل باسىنان بەرى ەلوردانىڭ 10 مىڭنان استام تۇرعىنىنا جان-جاقتى الەۋمەتتىك كومەك كورسەتىلدى.
ەستەرىڭىزگە سالا كەتەيىك، 2021-جىلى «قايىرىمدى ىستەر» اياسىندا مۇقتاج استانالىقتارعا 15 مىڭنان استام ازىق-تۇلىك سەبەتى تاراتىلدى.
