ەلوردادا تۇرعىن ءۇي سەرتيفيكاتىنىڭ مولشەرى 1,5 ميلليون تەڭگەگە ارتتى
بۇل تۋرالى قالا تۇرعىندارىمەن ەسەپ بەرۋ كەزدەسۋىندە ەلوردا اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، «شاڭىراق» بويىنشا تۇرعىن ءۇي سەرتيفيكاتتارىن الۋشىلار ساناتىن كەڭەيتۋ كەرەك.
ەگەر، بۇرىن تىزىمگە تەك الەۋمەتتىك جاعىنان از قامتىلعان ساناتتاعىلاردىڭ ۇشەۋى عانا كىرسە، ەندى وعان بارلىق توعىز سانات تا كىرەتىن بولدى.
«تۇرعىن ءۇي ماسەلەسى - ەڭ ماڭىزدى باعىتتىڭ ءبىرى. تۇرعىن ءۇي سەرتيفيكاتىنا قوسا «قازاقستاندىق تۇرعىن ءۇي كومپانياسى» ا ق- مەن بىرلەسىپ جۇزەگە اسىرىپ جاتقان باعدارلاماعا دا وزگەرىس ەنگىزىلدى. مۇندا ءبىز الەۋمەتتىك پاتەر الۋشىلار ساناتىن كەڭەيتتىك. بۇل الەۋمەتتىك پاتەرلەردى تەك مەديتسينا قىزمەتكەرلەرى مەن مۇعالىمدەر عانا ەمەس، سونىمەن بىرگە - ءورت سوندىرۋشىلەر، الەۋمەتتىك ماماندار، مادەنيەت جانە سپورت قايراتكەرلەرى، پوليتسيا دەپارتامەنتىنىڭ قىزمەتكەرلەرى دە الۋعا مۇمكىندىكتەرى بار. بۇل باعدارلاما بويىنشا باستاپقى جارنا پاتەر قۇنىنىڭ 1 پايىزىن قۇرايدى. تۇرعىن ءۇيدى الداعى ۋاقىتتا جەكەشەلەندىرىپ الۋعا بولادى»، - دەدى التاي كولگىنوۆ.
مەملەكەت باسشىسىنىڭ تاپسىرماسى بويىنشا ەلوردادا قولجەتىمدى باسپانا كولەمىنىڭ قۇرىلىسى ارتتى.
ەگەر 2018-جىلى 1100، 2019-جىلى 2900، 2020-جىلى 7 مىڭنان اسا الەۋمەتتىك پاتەر بەرىلسە، بيىل بۇل سان 10 مىڭعا كوبەيەدى. مۇنىڭ ءبىر بولىگى تۇرعىن ءۇي كەزەگىندە تۇرعاندارعا، تاعى ءبىر بولىگى - «تۇرعىن ءۇي قۇرىلىس جيناق بانكى» ارقىلى كەزەكتە تۇرعاندارعا بەرىلەدى.