كوروناۆيرۋسقا قارسى ۆاكسينا 1,5 جىلدان كەيىن دايىن بولۋى مۇمكىن

بەيجىڭ. قازاقپارات - كوروناۆيرۋسقا قارسى العاشقى ۆاكتسينالار 18 ايدان كەيىن دايىن بولۋى مۇمكىن، دەپ ءمالىم ەتتى دۇنيەجۇزىلىك دەنساۋلىق ساقتاۋ ۇيىمىنىڭ (د د ۇ) باسشىسى تەدروس ادانوم گەبرەيەسۋس.

بۇل تۋرالى قازاقپارات ۇيىمىڭ باسپا ءسوز قىزمەتىنە سىلتەمە جاساپ حابارلايدى.

«العاشقى ۆاكتسينا 18 ايدان كەيىن دايىن بولۋى مۇمكىن. سوندىقتان ءبىز وسى ۆيرۋسپەن كۇرەسۋ ءۇشىن بۇگىنگى كۇنى قولدا بار «قارۋدى» پايدالانا وتىرىپ، ءبارىن جاساۋىمىز كەرەك»، - دەپ كەلتىرىلگەن ونىڭ ءسوزى ۇيىم سايتىندا.

د د ۇ باسشىسى ۆاكسينالار مەن تەراپيالىق قۇرالداردى ازىرلەۋ ماڭىزدى ەكەنىن اتاپ ءوتتى. الايدا، بۇل زەرتتەۋ باعدارلاماسىنىڭ ءبىر بولىگىن عانا قۇرايدى.

«ولاردى ازىرلەۋگە ۋاقىت قاجەت بولادى. ءبىراق، ونىمەن ءبىر مەزگىلدە، ءبىز قورعانسىز ەمەسپىز»، - دەپ اتاپ ءوتتى تەدروس ادانوم گەبرەيەسۋس.

«قوعامدىق دەنساۋلىق ساقتاۋدىڭ ينفەكسيالارمەن كۇرەسە الاتىن كوپتەگەن نەگىزگى شارالارى بار»، - دەپ حابارلادى ول.

دۇنيەجۇزىلىك دەنساۋلىق ساقتاۋ ۇيىمى كوروناۆيرۋستىڭ جاڭا تۇرىنە COVID-19 اتاۋىن بەردى. سونىمەن قاتار، د د ۇ باسشىسى الەم ەلدەرىن جاڭا كوروناۆيرۋسپەن كۇرەستى جانداندىرۋعا شاقىردى. سونداي- اق ول حالىقارالىق قاۋىمداستىقتا ىندەتتىڭ الدىن الۋ ءۇشىن «مۇمكىندىكتەر تەرەزەسى» بار ەكەنىن اتاپ ءوتتى.

«بۇل ۆيرۋس - قوعامنىڭ ءنومىرى ءبىرىنشى جاۋى»، - دەپ تۇيىندەدى گەبرەيسۋس.

وتكەن تاۋلىكتە (11 - اقپان كۇنى ساعات 24:00-دەگى جاعداي بويىنشا) ماتەريكتىك قىتايدا كوروناۆيرۋستى جۇقتىرۋدىڭ 2015 جاڭا جاعدايلارى (حۋبەي پروۆينسياسىندا - 1638)، 97- ءسى (94- ءى - حۋبەيدە) مەرت بولعان. سوڭعى مالىمەتتەر بويىنشا، ق ح ر - دا كوروناۆيرۋس اۋرۋىنىڭ راستالعان جاعدايلارىنىڭ جالپى سانى – 44653، قازا تاپقاندار - 1113.