ءۇندىستاندىق ايەلدىڭ اسقازانىنان دارىگەرلەر 1,5 كەلى مەتال بۇيىمدارىن الدى
دارىگەرلەردىڭ ايتۋىنشا، 26 جاستاعى كەلىنشەك 5 جانە 10 رۋپييلىك 90 عا جۋىق مونەتا جانە مىس پەن لاتۋننان سوعىلعان اشەكەي بۇيىمداردى جاسىرماق بولىپ جۇتىپ جىبەرگەن. اشەكەيلەردىڭ اراسىندا ءتىپتى قولساعات تا بار بولىپ شىقتى.
قىزدىڭ شەشەسىنىڭ ايتۋىنشا، ول كەيدە ەسىن بىلمەي قالاتىن كورىنەدى. ايەل ۇيدەگى اشەكەي بۇيىمدارىنىڭ جوعالا باستاعانىن بايقاعان. ال مونەتالاردى قىز اعاسى جۇمىس ىستەيتىن دۇكەننەن العان.
«ءبىز ونى اڭدىپ جۇردىك، ءبىراق ول سوندا دا ءبىر امالىن تاۋىپ، اشەكەيلەردى جۇتا بەرىپتى. سوڭعى ەكى ايدا مازاسى كەتتى»، - دەيدى قىزدىڭ شەشەسى.
اقىر سوڭىندا «تەمىر جەگىش» قىزدى اۋرۋحاناعا جاتقىزۋعا تۋرا كەلگەن. ونىڭ اسقازانى مەتالعا تولعانىن سول جەردە دارىگەرلەر انىقتادى. ارتىنشا، شۇعىل وتا جاساپ، اسقازانىن تازالادى. ەندى قىزدىڭ تۋىستارى ونى پسيحياترعا كورسەتپەك.