تاۋاردى 1,5 ميلليون قازاقستاندىق ينتەرنەت ارقىلى ساتىپ الىپ ءجۇر

استانا. قازاقپارات - اعىمداعى جىلدىڭ 9 ايىندا قازاقستاندا پوشتا جانە كۋرەرلىك قىزمەت كولەمى 24,2 ميلليارد تەڭگەگە جەتكەن. بۇل وتكەن جىلدىڭ وسىنداي كەزەڭىمەن سالىستىرعاندا 7 پايىز كوپ،

دەپ حابارلايدى  Еnergyprom.kz-قا سىلتەمە جاساعان قازاقپارات.

ەڭ كوپ قىزمەت كولەمى قارجى ورتالىعىنا تيەسىلى. الماتىدا - 56 پايىز، 13,5 ميلليارد تەڭگەنى قۇراعان. بۇل وتكەن جىلمەن سالىستىرعاندا، 1,7 پايىز كوپ. استانادا «قازپوشتا» ۇلتتىق وپەراتورى ەلدەگى ەلەكتروندىق كوممەرتسيانى بەلسەندى دامىتۋ ءۇشىن ارنايى بازا قۇرعان. وسىلايشا، ەلوردادا ينتەرنەت- دۇكەندەرگە كومەك كورسەتۋ ءۇشىن ارنايى فۋلفيلمەنت- ورتالىقتار قىزمەت ەتۋدە. ورتالىق قىزمەتكەرلەرى تاۋاردى قابىلداپ، ساقتايدى، ونى بۋىپ- ءتۇيىپ، تۇتىنۋشىعا جىبەرەدى.

«قازپوشتا» ا ق باسقارما ءتوراعاسى ساكەن سارسەنوۆ قازىرگى كەزدە ينتەرنەت- دۇكەن اشۋ ءۇشىن سايت اشۋ جەتكىلىكتى ەكەنىن اتاپ ءوتتى. بۇگىندە قازاقستاندا ينتەرنەت ارقىلى ساتىپ الۋشىلار سانى 1,5 ميلليون ادامعا جەتىپ وتىر. بۇل وتكەن جىلمەن سالىستىرعاندا 11 پايىزعا ارتىق.

 «قازپوشتا» ا ق ІТ جانە ترانسفورماتسيالار جونىندەگى باسقارۋشى ديرەكتورى اسقاربەك الشانبايەۆتىڭ مالىمەتىنە سايكەس، قازاقستاندا E-commerce شامامەن 3 پايىزدى قۇراپ وتىر. ا ق ش- تا بۇل كورسەتكىش 15 پايىز، ال رەسەيدە - 5-6 پايىز. الشانبايەۆ ءوسىمنىڭ قارقىندى ءجۇرىپ جاتقانىن جانە 2-3 جىلدا رەسەي دەڭگەيىنە جەتەتىنىن اتاپ ءوتتى.