پويىز بيلەتىنىڭ تاپشىلىعى: مەمورگاندار ءۇشىن كۇندەلىكتى 1,5 مىڭ بيلەت بروندالادى

استانا. قازاقپارات - «جولاۋشىلار تاسىمالى» ا ق باس ديرەكتورىنىڭ ورىنباسارى دانيار نۇرماعامبەتوۆ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىندە وتكەن كەڭەستە بيلەت تاپشىلىعىن شەشۋ جولدارىن ۇسىندى، دەپ حابارلايدى قازاقپارات ءتىلشىسى.

كومپانيا وكىلى كۇن سايىن  1500 -  1700 بيلەت كۇشتىك قۇرىلىمدار مەن مەملەكەتتىك ورگاندار ءۇشىن بروندالاتىنىن ايتتى.

«بوس بيلەتتەر كۇتپەگەن جەردەن قايدان پايدا بولادى دەگەن سۇراقتار بار. كۇن سايىن ق ر اۋماعىندارداعى بارلىق پويىزداردا  1500- 1700 بيلەت كۇشتىك قۇرىلىمدار مەن مەملەكەتتىك ورگاندار ءۇشىن بروندالادى. ولار پويىزدىڭ جۇرۋىنە ەكى ساعات قالعاندا بوساتىلادى. كوپ جاعدايدا بۇل بيلەتتەردىڭ 80 پروتسەنتى قولدانىلمايدى. سوندىقتان، بروندالعان بيلەتتەر سانىن قىسقارتۋ بيلەت تاپشىلىعى ماسەلەسىن شەشۋگە ەداۋىر كومەكتەسەر ەدى»، - دەدى «جولاۋشىلار تاسىمالى» ا ق باس ديرەكتورىنىڭ ورىنباسارى دانيار نۇرماعامبەتوۆ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىندە وتكەن كەڭەستە.

 ونىڭ ايتۋىنشا، ق ر ينۆەستيتسيالار جانە دامۋ مينيسترلىگىنە بىرنەشە رەت جۇگىنگەن. ازىرگە، بۇل تۋرالى ارنايى شەشىم شىقپاعاندىقتان، بروندالعان بيلەتتەر سانى وزگەرىسسىز قالۋدا.

سونىمەن بىرگە، دانيار نۇرماعانبەتوۆ بيلەت الىپساتارلارىنا توسقاۋىل قويۋ ءۇشىن اتقارىلعان شارالاردى ەسكە سالدى.

«بيلەتتەردى قايتارۋ تاريفىن  1000 تەڭگە ەتىپ بەكىتتىك. ارينە، حالىق تاراپىنان نارازىلىقتار بولدى. ءبىراق، وكىنىشكە وراي، بىزدە باسقا امال جوق. ەكىنشىدەن، ەگەر ادام بيلەتتى كەرى قايتارۋدى ۇيعارسا، جەكە ءوزىنىڭ نەمەسە سەنىمحات ارقىلى وتكىزۋىن مىندەتتەدىك. بۇعان دەيىن الىپساتارلار جەكە كۋالىك كوشىرمەسى ارقىلى بيلەتتەردى وڭاي الماستىراتىن. اتالعان ەكى شارانى ەنگىزۋ ارقىلى بيلەتتى كەرى قايتارۋ كورسەتكىشى 25 پروتسەنتكە دەيىن ازايدى»، - دەيدى دانيار نۇرماعانبەتوۆ.

اۆتور: ايجان سەرىكجان قىزى