بىشكەكتە 1,5 توننا جىلقى ەتىن اسىپ الەمدىك رەكورد جاسادى - فوتو
استانا. قازاقپارات - بىشكەكتە 1464 كەلى بولاتىن جىلقى ەتى مەن ۇزىندىعى 117 مەتر قازى دايىندالدى، دەپ حابارلايدى akipress.org.
شارانى ۇيىمداستىرۋشىلاردىڭ ءبىرى جامالبەك ىرساليەۆتىڭ ايتۋىنشا، دايىندالعان ەت گيننەستىڭ رەكوردتار كىتابىنا ەنۋى مۇمكىن. بارلىق سانيتارلىق تالاپتار ساقتالىپ، شارا بارىسى تولىعىمەن تىركەلگەن.
بۇگىنگى ۇلكەن قازانداعى استى باقىلاۋعا شۆەتسيا مەن يتاليادان كەلگەن ەكى اسپاز قاتىستى.
9 باس جىلقى سويىلىپ، سيىمدىلىعى 150 ليترلىك 12 تايقازان قۇرىلعان.
«قىرعىز تيلەكتەشتيگي» قوعامدىق بىرلەستىگى بۇل شارانى جىل سايىن 5 -ناۋرىزدا اتاپ وتىلەتىن قالپاق كۇنىنە ارناعان. 8 -ناۋرىزدا گيننەستىك رەكوردتار كىتابىنان جاۋاپ كەلگەن. وندا ءبىرىنشى تۋردان وسى شارا ءساتتى وتىلگەنى اتاپ وتىلگەن. قازىر ەكىنشى تۋر قۇجاتتارى ازىرلەنگەن، فوتو جانە ۆيدەو تىركەۋ جۇرگىزىلدى. قورىتىندى ەكى اپتادا ءازىر بولادى دەپ حابارلانعان.
دايىن بولعان استى جينالعان قوناقتارعا ۇلەستىردى. ەڭ الدىمەن جەتى وبلىستان جينالعان اقساقالدارعا ءدام تاتقىزدى.
ەسكە سالا كەتسەك، 2015 -جىلعى 6 -شىلدەدە استانا كۇنىنە ارناپ ۇلكەن تايقازانعا ەت اسىلدى. 746 كەلى بولاتىن الەمدەگى ەڭ ۇلكەن ەت تاعامى مەرەكەگە كەلگەن حالىققا تاراتىلىپ، ارتىنشا ۇيىمداستىرۋشىلارعا گيننەستىڭ رەكوردتار كىتابىنىڭ سەرتيفيكاتى تابىس ەتىلدى.
فوتو: kg.akipress.org
