استانانى گازداندىرۋ ماسەلەسى 1,5 جىلدا شەشىلۋى ءتيىس - نۇرسۇلتان نازاربايەۆ
ق ر پرەزيدەنتى قىزىلورداداعى قاراوزەكتەن جەزقازعان، قاراعاندى، تەمىرتاۋ، استانا ارقىلى ماگيسترالدى گاز قۇبىرى سالىناتىنىن ءمالىم ەتتى.
«بۇگىندە رەسپۋبليكاداعى گازداندىرۋ دەڭگەيى شامامەن 50 پروتسەنتتى قۇرايدى. باتىس پەن وڭتۇستىكتەگى 9 وبلىس گازبەن قامتاماسىز ەتىلدى. ورتالىق جانە سولتۇستىك وڭىرلەر ءالى دە گازسىز قالىپ وتىر. وسىعان بايلانىستى مەن قىزىلوردا وبلىسىنداعى قاراوزەك جەرىنەن جەزقازعان، قاراعاندى، تەمىرتاۋ، استانا ارقىلى بويىنشا ماگيسترالدى گاز قۇبىرىن سالۋىمىز كەرەك دەپ ويلادىم. بۇل 2 ميلليون 700 مىڭ ادامدى گازبەن قامتاماسىز ەتۋمەن قاتار، ارقانىڭ ەكولوگيالىق احۋالىنا جاقسى اسەر ەتەتىن بولادى»، - دەدى نۇرسۇلتان نازاربايەۆ ق ر پارلامەنتى پالاتالارىنىڭ بىرلەسكەن وتىرىسىندا.
پرەزيدەنتتىڭ ايتۋىنشا، گازداندىرۋ ماسەلەسى الداعى 1-1,5 جىلدا شەشىلۋى ءتيىس جانە بۇل استاناداعى زياندى قالدىقتاردىڭ اۋاعا تارالۋىن ەداۋىر ازايتپاق.
«ءبىز تۇڭعىش رەت باتىستاعى گازدى وڭتۇستىك ارقىلى شىمكەنت-الماتىعا دەيىن جەتكىزدىك. مۇمكىنشىلىك بار. سوندىقتان، بۇل ماسەلەنى شەشەتىن بولساق، استانانىڭ وزىندە زياندى قالدىقتاردىڭ اۋاعا تارالۋى 6 ەسەگە نەمەسە 35 مىڭ تونناعا ازايادى. سارىارقانىڭ سارى جەلى ءبارىن الىپ كەتەدى دەگەن وي بىزدە بولدى. دەگەنمەن، كەيىنگى كەزدە كورىپ ءجۇرمىز. قالادا تۇرعىننىڭ جانە كولىكتىڭ كوبەيۋىنە بايلانىستى، ەكى ج ە و- نى قاتار كومىرمەن جاققان كەزدە قالانىڭ ۇستىندە ىلعي تۇمان تۇراتىن بولدى. ودان كەتۋىمىز كەرەك. قالا اكىمشىلىگى دە جۇمىس ىستەپ جاتىر. ەگەر مىنا ماسەلەنى شەشسەك، جولشىباي قانشا ادامعا جەڭىلدىك بولادى. مۇنى ءبىر-ءبىر جارىم جىل ىشىندە شەشۋ كەرەك»، - دەپ اتاپ ءوتتى پرەزيدەنت.
ەلباسى قاراوزەك - جەزقازعان - قاراعاندى - تەمىرتاۋ - استانا باعىتىنداعى ماگيسترالدى گاز قۇبىرى ارقىلى ەلىمىزدىڭ سولتۇستىگىندەگى پاۆلودار، پەتروپاۆل، كوكشەتاۋ قالالارىن دا گازبەن قامتاماسىز ەتۋ قاراستىرىلاتىنىن جەتكىزدى. بۇل ءۇشىن جوباعا ۇكىمەت حالىقارالىق قارجى ينستيتۋتتارىنان ءتيىستى قارجىلاندىرۋ تارتۋى ءتيىس.
اۆتور: ايجان سەرىكجان قىزى
