وسكەمەندە جەردىڭ توڭى 1,5 مەترگە جەتكەن

شىعىس قازاقستاندا قاردىڭ قالىڭدىعىن ولشەۋ جۇمىستارى قارقىن الدى. ناۋرىز ايى تۋعانىمەن، ازىرگە وڭىردە اۋا تەمپەراتۋراسى تومەن تۇر. ەگەر كۇن كۇرت جىلىنار بولسا، مۇنىڭ سوڭى اۋلالاردى سۋ الۋىنا اكەپ سوقتىرۋى مۇمكىن. وسى سەبەپتى جاۋاپتى مەكەمەلەر قار مەن مۇزدىڭ، جەر توڭىنىڭ قالىڭدىعىن ولشەۋ شارالارىن جيىلەتىپ وتىر.

وسكەمەن قالالىق توتەنشە جاعدايلار باسقارماسىنىڭ حابارلاۋىنشا، قالا اۋماعىنداعى جەردىڭ توڭى 150 سانتيمەتردى قۇراپ وتىر. بىلتىر وسى ۋاقىتتا توڭنىڭ قالىڭدىعى 57 سانتيمەتر عانا بولعان. سونىڭ وزىندە جەكە سەكتورداعى ونداعان كوشەگە سۋ جايىلۋ قاۋپى تونگەن.

توتەنشەلىكتەر قارۋ ەرۋ ماۋسىمىنا دايىندىقتى كۇزدە باستاپ كەتكەندىكتەن، شتاتتىن تىس جاعدايعا دايىنبىز دەپ وتىر. مەردىگەر ۇيىمداردىڭ كۇشىمەن بىتەلۋى مۇمكىن ارىقتاردىڭ ءبارى قارا كۇزدە ارشىلىپ، سۋاعارلار تازالانعان.

 «قازىر جىلدا سۋ باسۋ قاۋپى تونەتىن اۋلالاردىڭ بارىنە ەستەلىك اقپاراتتار تاراتىلۋدا. تاسقىنعا قارسى تۇراتىن مەكەمەلەردىڭ دايىندىعى دا تەكسەرىستەن ءوتىپ جاتىر. بىرنەشە كۇننەن كەيىن ت ج باسقارماسى تاۋلىكتىك كەزەكشىلىك ورناتادى. اۋلالاردى سۋ العان جاعدايدا «وسكەمەن ۆودوكانال» مەكەمەسىنەن قوسىمشا كومەك دايىن تۇر» - دەلىنگەن باسقارما تاراتقان مالىمەتتە.

توڭنىڭ قالىڭدىعىن ەسكەرە وتىرىپ، توتەنشە جاعداي وكىلدەرى وسكەمەن تۇرعىندارىن قار ەرۋ ناۋقانىنا دايىن بولۋعا شاقىرادى. ماماندار اۋلاداعى قاردى ءۇي ىرگەسىنەن الىسقا تاسىپ، ارىق پەن ارنالاردى قوقىستان جانە مۇزدان ۋاقتىلى تازارتۋدى سۇرايدى.

ءدال وسىنداي ولشەۋ جۇمىستارى وبلىستىڭ باسقا اۋداندارىندا دا ءجۇرىپ جاتىر. ونداعى نەگىزگى ماقسات - قار كۇيىندەگى ىلعالدىڭ ناقتى مولشەرىن انىقتاۋ. شىعىس وڭىرلىك ايەروۇتقىر جەدەل قۇتقارۋ جاساعى مەن «قازگيدرومەت» ماماندارى زايسان كولىنىڭ سالالارى مەن قارا ەرتىستىڭ قوس القابىندا، كۇرشىم اۋدانىنداعى اقبۇلاق، التاي ەلدى مەكەندەرىندە تارباعاتاي اۋدانىنىڭ كوكجىرا اۋىلىندا، زايسان اۋدانىنىڭ دايىر اۋىلىندا قاردىڭ قالىڭدىعىن ولشەۋ جۇمىستارىن جۇرگىزدى. ونىڭ ناتيجەلەرى كەيىن ناقتىلانباق.

اۆتور: ەسىمجان ناقتىباي